Вкупно 500 пациенти во земјава досега се излекувани од ковид-19. Најголем дел од нив, како што вчера истакна министерот за здравство Венко Филипче, се лица кои биле третирани во домашни услови, а помал бројот на оздравени пациенти во болнички услови.

Филипче притоа најави дека Министерство за здравство и Комисијата за заразни болести денеска до Владата ќе предложат санкционирањето за неносење заштитна опрема (маска или прекривка на устата и носот) во насока на заштита од ширењето на коронавирусот да почне и пред 1 мај по констатациите дека голем дел од граѓаните не користат заштитна опрема или неправилно ја користат.
Надлежните апелираат да се почитува мерката и потсетуваат дека заштитната опрема да се носи како што е пропишано – во затворен простор и на отворено кога не може да се држи физичка дистанца од два метри.

Филипче појасни дека ваквото барање е последица на зачестените фотографии во медиумите и на социјалните мрежи на кои се гледа дека граѓани не ја почитуваат мерката за носење заштитна опрема во услови каде е пропишано, но и граѓани кои ја носат маската или прекривката на лицето под брадата или во рака. Има и граѓани кои, како што рече, ја почитуваат оваа мерка свесни дека ова е еден од клучните механизми за борба против вирусот.

Надлежните се уште немаат донесено одлука дали претстојниот викенд на кој му претходи и празникот 1 мај ќе има тридневно ограничување на движењето на граѓаните. Одлуката ќе биде донесена врз основа на анализа на однесувањето на граѓаните, дали се почитуваат мерките за заштита од коронавирусот за задолжителна заштитна опрема и одржување дистанца.