Израелскиот премиер Бенјамин Нетанјаху денеска од Париз порача дека нема да дозволи турскиот претседател Реџеп Тајип Ердоган да му држи лекции за морал.
– Ердоган го нападна Израел. Немам обичај да слушам лекции за морал од еден лидер кој ги бомбардира курдските села во својата родна Турција, кој испраќа новинари во затвор, кој му помага на Иран да ги заобиколи меѓународните санкции и кој ги поддржува терористите, вклучително и тие во Газа, да убиваат недолжни луѓе, изјави Нетанјаху.
Ваквиот став на израелскиот премиер претставува реакција на изјавата на Ердоган дека Израел е окупаторска држава.
Ердоган оцени дека Израел „предизвикува терор со својата полиција и војници“ и додаде дека одлуката на американскиот претседател Доналд Трамп да го признае Ерусалим за израелски главен град „не е во согласност со законите или правдата“.
– Израел продолжува да се шири и да ги потиснува Палестинците. Израел е држава на окупација. Тие напаѓаат цивили, вклучително и деца во Газа и на Западниот брег, спроведувајќи терор со својата полиција и војници, истакна Ердоган.