Доналд Трамп донел одлука да ја назначи Ники Хејли, гувернерка на Јужна Каролина за амбасадор на САД во ОН, јави Си Ен Ен.
Хејли веќе втор мандат е гувернерка на Јужна Каролина од републиканската партија, а станала позната по заложбите за отстранување на конфедеративното знаме, од јавните места во главниот град на државата.
За време на економската криза во САД, Хејли активно се залагала за отворање на нови работни места во Јужна Каролина, членка на САД во која се затвориле многу фабрики. Ники Хејли стана позната како „гувернер за работни мести“. Иако не располага со искуство во меѓународна соработка, за многумина ова не претставува пречка да се истакне на новата функција.
Како ќерка на индиски емигранти, се родила во Бамерг, Јужна Каролина, мало место со околу 3,600 жители.
Досега се знае дека Рејнс Прибус ќе биде шеф на неговиот кабинет, а Стив Бенон ќе биде главен стратег. Сенаторот од Алабама, Џеф Сешонс ќе биде главен обвинител, а конгресменот Мајк Помпео директор на ЦИА. Трамп најави дека наскоро ќе ги пополни преостанатите функции во неговата администрација. Меѓу имињата кои се вртат е и поранешниот републикански кандидат за претседател на изборите во 2012-та, Мит Ромни, кој се споменува на позицијата државен секретар на САД.