Македонија денеска во втор настап на Европското првенство за млади фудбалери во Полска. Ривал на избраниците на Благоја Милевски е селекцијата на Србија. Балканската пресметка во групата Б е закажана за 18 часот во Бидгошч каде двата тима гледаат прилика за први голови и победа на турнирот по стартните порази од Шпанија, односно, Португалија. Пиринејските репрезентации, пак, од 20,45 часот во Гдиња ќе се судрат за првото место на табелата.
„За ниту еден од нас не е завршено првенството и покрај убедливиот пораз од Шпанија во првото коло. Денешниот дуел со Србија е клучен. Свесни сме дека ќе биде тешко, за противник го имаме светскиот шампион до 20 години, но ние сме навикнати на тоа. Веруваме дека можеме да се вратиме и на играчки и на резултатски план. Се надевам дека ќе бидеме на ниво од претходниот натпревар во ова балканско дерби и резултатот ќе биде во наша корист“, порача Бобан Николов.
Младите фудбалски репрезентации на Македонија и Србија по третпат ќе играат за бодови по разделбата на северниот сосед со Црна Гора, покрај неколкуте пријателски. Двете селекции беа заедно во група во квалификациите за ЕП 2013. Србите славеа со 5:1 во септември во 2012 година и подоцна се пласираа на завршниот турнир, Самир Фазли тогаш беше стрелец на единствениот гол за „црвено-жолтите“ на стадионот на Младост во Крушевац. Мечот на домашен терен во истиот циклус заврши 1:1 (Ферхан Хасани реализира од пенал).
Македонија има два пораза од Србија како дел од заедницата СР Југославија во квалификациите за ЕП 2000. Противникот триумфира во Белград со 2:0 и со 8:0 во Скопје.
Селекторот Благоја Милевски призна дека ќе биде тешко да се врати тимот по убедливиот пораз од Шпанија, но по слободниот ден што го добија фудбалерите и она што го видел на тренинзите пред дуелот со Србија, сепак, изрази верба за повторување на изданието со „фуријата“.
„Знаеме дека имаат одлични поединци кои настапуваат со средини како Германија, Италија, Англија меѓутоа она на што сме фокусирани е нашата игра. По поразот од Шпанија им реков на играчите да држат горе глава и да продолжат да веруваат во сопствените квалитети. Продолжуваме со тимски дух како што беше пред натпреварот со Шпанците иако поразот има горчлив вкус. Одиме офанзивно бидејќи поинаку не сакаме и не знаеме. Ако против Шпанија имавме 24 успешни напади, сигурно можеме и против Србија“, порача Милевски од Бидгошч.
Вчера се одигра второто коло во групата А. Англија ја совлада Словачка со 2:1 и го презеде врвот на табелата, а Полска и Шведска одиграа 2:2.