Во Кривичниот суд во Скопје продолжува судењето за случувањата во Собранието на 27 април минатата година.
На денешното рочиште одбрана треба да дава обвинетиот Александар Василевски-Нинџа, кој има предложено тројца сведоци. На минатото рочиште од правото да изнесат одбрана се откажаа обвинетите Вилијам Михајловски, Никола Митревски-Кољо и Митре Питроповски.
Нинџа беше споменат во сведочењето на речиси сите обвинети за учество во насилствата од 27 април. Сепак, најдетално и со најсериозни обвинувања беше сведочењето на браќата Стефан и Михаил Младеновски пред три дена,обајцата обвинети дека биле дел од толпата.
За него рекоа дека, иако не бил вработен во УБК, сепак дејствувал како тамошен вработен, а располагал и со ресурси од управата, односно имал два блиндирани автомобили, дека ги платил фантомките што им биле делени на насилниците и дека по завршувањето на изборите во 2016 година бил дел од наводно сценариот за напад на зградата на ДИК со молотови коктели.
Во сведочењето на браќата Младеновски како еден од роганизаторите беше споменат и екс директорот на УБК Владимир Атанасовски, кој пред два дена беше приведен и доби 30 дневен притвор за настаните од 27 април.
Судскиот процес го води судијката Добрила Кацарска, а застапници на обвинението се Вилма Русковска и Ивана Трајчевска.
За случувањата во Собранието на 27 април 2017 година обвинети се вкупно 33 лица, од кои 31 лице за терористичко загрозување на уставниот поредок на државата и двајца за поттикнување. Претходно поради влошена здравствена состојба на обвинетиот Сашко Марковски постапката за него беше одвоена и треба да продолжи по еден месец.
Меѓу обвинетите се повеќе пратеници, вработени во МВР и собраниското обезбедување, уметници. Тие пред Судот кажаа дека го разбираат обвинението, но не се чувствуваат за виновни.
На обвинителната клупа се Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, Митко Чавков, Митко Пешовски, Душко Лазаров, Горан Јошевски-Леви, Оливер Поповски, Оливер Радулов, Мунир Пепиќ, Абдуљфета Алими, Елена Доцевска-Божиновска, Иван Цветановски, Борис Дамовски, Богдан Илиевски-Бетмен, Владо Јовановски, Игор Дурловски, Стефан Младеновски, Михаил Младеновски, Захарие Симовски, Младен Додевски, Јане Ченто, Горанче Ангеловски, Игор Југ, Илија Славески, Влатко Трајков, Вилијам Михајловски, Никола Митревски-Кољо, Александар Василевски-Нинџа и Митре Питроповски.