Новак Ѓоковиќ и Енди Мареј во директен дуел ќе решаваат за титулата на завршниот Мастерс во Лондон, но и за првото место на АТП листата. За разлика од Британецот кој мораше да одигра маратон (три часа и 38 минути) против Раониќ, Србинот ја заврши својот дел од работата во полуфиналето за нешто повеќе од еден час, поточно 66 минути, на теренот во „О2 арена“. Притоа немаше никакви проблеми во дуелот со Кеи Нишикори што го доби со 6:1, 6:1.
Второто полуфинале на завршниот Мастерс ни одблиску не беше налик на првото. Можеби и не се очекуваше така, резултатски, тесен меч, можеби и не се очекуваа три сета иако Нишикори знае да биде незгоден против секого, но, секако, се очекуваше многу повеќе од него. Ѓоковиќ, речиси, и да не се испоти во натпреварот, максимално брзо го реши го предизвикот и заштеди и сили и време за рекуперација и подготовки пред финалето.
Мечот за титулата во Лондон е закажан за утревечер со почеток во 19 часот. Како увертира на финалниот меч во поединечна конкуренција, од 16.30 часот ќе играат Континен/Пирс против Класен/Рам за трофеј на завршниот турнир во конкуренција на двојки