Воведните минути од второто полувреме урнаа се што изградија македонските ракометари во првиот дел за што на крајот резултираа со пораз од Чешка со 25:27 во второто коло во групата Б на 14. Европско првенство.
„Црвено-жолтите“ заминаа на одмор со плус два (11:9), но противникот по враќање од соблекувална нашправи серија од 5:1, па негативата набрзина ја претвори во позитива што успеа да ја одржи до последниот звук на сирената.
Најефикасен на средбата беше Кире Лазаров со 11 гола, пет реализира Дејан Манасков, додека Гоце Георгиевски постигна четири. Но, потфрлија голманите кои мечот го завршија со само четири одбрани од кои три запиша Борко Ристовски, а една Никола Митревски.
Прв стрелец кај чешката селекција, која остана во игра за топ 12, беше Кашпарек со седум гола, по пет дадоа Бабак и Здрахала.
Македонија во последниот настап во групата Б ќе игра против Австрија во вторник од 18.15 часот.