Најмалку 1.297 луѓе загинаа во силниот земјотрес што викендот го погоди Хаити, соопшти Агенцијата за цивилна заштита на таа земја.
Бројот на загинати од земјотресот се зголеми на 1.297 на 15 август, се вели во извештајот за ситуацијата, во кој е ажуриран и бројот на повредени од најмалку 2.800 на повеќе од 5.700.
Земјотресот предизвика и огромна материјална штета, а Обединетите Нации (ОН) најавија финансиска помош.
Обединетите нации ќе обезбедат најмалку осум милиони долари за помош на жртвите од земјотресот на Хаити. Оваа сума ќе оди за жртвите од катастрофата за медицинска нега, чиста вода, привремени засолништа и санитарни услови, изјави заменик генералниот секретар, задолжен за хуманитарни прашања, Мартин Грифитс.
Земјотрес со јачина од 7,2 степени според Рихтеровата скала го погоди регионот на Хаити во саботата наутро. Епицентарот на земјотресот бил регистриран на 40 километри од Ле Квет на длабочина од 10 километри. Уништени се околу 13.000 згради, вклучително и медицински и верски институции. Владата воведе едномесечна вонредна состојба.