Адам Лалана важи за еден од најдобрите фудбалери на Ливерпул во оваа сезона. Награда за неговите партии стигна во вид на нов договор според кој англискиот репрезентативец ќе остане на „Енфилд“ до 2021 година.
Лалана стигна во Ливерпул пред две години од екипата на Саутемптон. Во меѓувреме беше оспоруван од бројни навивачи на „црвените“, но остана и впечатокот дека е важна алка во играта на Јирген Клоп.
„Самото доаѓање во Ливерпул беше голема работа. Но, потпишување на нов договор покажува дека луѓето што носат одлуки сакаат да останете“, рече Лалана чија верност кон клубот требаше да заврши во 2019 година и продолжена е за две години.
На 27 натпревари, колку што одигра во оваа сезона, тој постигна седум погодоци. Според „Ливерпул Ехо“ неговата неделна плата во иднина ќе изнесува 110.000 фунти.