Светскиот тенисер во тресе нов скандал во предвечерјето на Австралија опен, традиционалниот прв гренслем во секоја натпреварувачка сезона. Епицентар на аферата е Шпанија чии официјални лица соопштуваат за приведување на 83 лица под сомнение дека лажирале исходи на тениски мечеви во соработка со криминална банда од Ерменија.
Шпанскиот весник „Ел Паис“ објави дека меѓу приведените во операцијата со кодно име „Битурес“ има 28 професионални тенисери кои настапувале на турнири од Фјучерс и Челинџер сериите. Како најзвучно име се споменува ветеранот Марк Форнел (36) кој на крајот на 2018 година беше на 1.007 место во сингл и на 772. во дубл на АТП ранг листата. Инаку негов најдобар пласман во кариерата е 236 место во поединечна конкуренција сингл во 2007 година. Медиумите на Пиринеите пишуваат и за тенисер кој учествувал на ланското издание на Ју-Ес опен, но неговиот идентитет засега останува во тајност.
Европол претходно соопшти дека во акцијата на шпанските полициски сили се извршени 11 претреси на домови пришто се запленети 167.000 евра во кеш, пет луксузни автомобили, кредитни картички, накит, 50 електронски уреди, пушка сачмарка, недвижности и замрзнати се 42 банкарски сметки. За сомнителни се сметаат најмалку 97 меча, а проценките на европските полициски службеници се дека Ерменците оперирале во „белиот спорт“ најмалку од февруари во 2017 година.
Полициски извори истакнаа дека организираната банда од Ерменија ги подмитувала тенисерите кои однапред ќе гарантираат за резултати на натпреварите. При облозите буиле користени идентитети на илјадници граѓани, а членовите на ерменската група и лично присуствувале на мечевите за да се осигураат дека играчите ќе го почитуваат договореното.