Трансфер сагата на преодниот рок заврши. Килијан Мбапе го напушти Монако и од оваа сезона ќе биде во нападот на ПСЖ иако во трката за негов потпис учествуваа Реал Мадрид, Барселона и Арсенал. Со тоа „светците“ ја активираа втора „бомба“ ова лето по Нејмар за кого платија неверојатни 222 милиона евра.

„Среќни сме поради доаѓањето на Мбапе. Оваа сезона ќе настапува како позајмен фудбалер од Монако по што ПСЖ ќе го откупи неговиот договор“, се вели во објавата на францускиот вицешампион кој и онака имаше страшно добри офанзивни играчи.

Договорот меѓу ПСЖ и Монако е следен. По завршување на сезоната Мбапе ќе потпише договор со „светците“ до 2022 година. Тимот од Монте Карло догодина ќе добие 145 милиони евра и плус уште 35 милиони преку бонуси што богатите арапски газди ќе ги чини вкупно 180 милиони евра што го прават 19 годишниот напаѓач втор најскап фудбалер во историјата.