Шкендија ќе патува со гол предност на реваншот со Шериф во второто квалификациско коло за фудбалската Лига на шампиони. Тетовци вечерва на „Филип Втори“ арената го совладаа молдавскиот првак со 1:0. Стрелец на единствениот погодок на средбата беше Бесарт Ибраими од слободен удар во 24 минута.
„Црвено-црните“ може да жалат што нема да понесат поубедлива залиха за возвратните 90. минути од двомечот со екипата од Тираспол. Покрај постигнатиот погодок, Шкендија имаше уште две прилики во првото полувреме за дуплирање на водството, двете преку Стенио Жуниор.
Најпрво во 36 минута, Бразилецот се закани со глава, а топката во последен момент, кога сите ја видоа во мрежата, во корнер ја исфрли еден од гостинските дефанзивци. Пет минути подоцна Жуниор шутираше од околу 20-тина метри пришто левиот дирек беше сојузник на голманот Звонимир Микулиќ.
Ниту Шериф не беше без прилики за израмнувачки гол, но двете најсериозни што ги имаа Молдавците ги одбрани Костадин Захов.
Реваншот меѓу Шкендија и Шериф е во вторник (31 јули) во Тираспол со почеток во 19 часот. Подобриот во двомечот ќе игра против Салцбург во третото квалификациско коло за ЛШ. Поразениот, пак, ќе се пресели во третата рунда квалификации за Лига Европа во која ќе се пресмета со победникот од натпреварите меѓу Валур од Исланд и Санта Колома од Андора.