Македонија ја совлада Црна Гора со 29:28 во второто коло во групата Ц и се промовира како сигурен патник во главната фаза на 13. Европско првенство во ракомет во Хрватска. И вечерашните два бода беа осигурани во неизвесна завршница како против Словенија за многу помотно дочекување на последниот настап во „Загрепска арена“ во среда од 18,15 часот против Германија. Во случај на триумф, тогаш составот на Раул Гонзалез ќе се пресели во Вараждин со четири бода и максимален ефект по првиот круг што и нема да чуди ако се има предвид тешко изборениот бод на Германците против Словенија (25:25).
„Имаме четири бода. Второто полувреме беше многу подобро, одбраната и нападот. Сите бевме супер, имавме трпение“, беше првичниот коментар на селекторот Раул Гонзалес.
Филип Миркуловски во најавата за мечот предупреди дека Црногорците не смеат да се потценат алудирајќи на нивниот лесен пораз од Германците во првото коло. Дека извонредниот среден бек на македонската репрезентација беше во право се покажа на дело. Црногорците беа одличен ривал во воведните 30 минути што ги решија во своја корист со 16:15.
Но, сликата на теренот се смени во полза на Македонија во продолжение на средбата. „Црвено-жолтите“ заиграа полесно, го пронајдоа својот ритам, коригираа добар дел од пројавените пропусти во првиот дел и како резултат на тоа „побегнаа“ на плус четири во три ситуации за што најголеми заслуги одат на Филип Миркуловски, Филип Кузмановски и Филип Лазаров. Но, наместо мирен финиш, дозволија нова неизвесност за бодовите што за среќа заврши во нивна корист за што придонесе и голманот Ристовски чија интервенција при цепелинот на Црногорците значеше високо подигнати раце, гордо кренати глави, насмевки на лицата и паѓање камен од срцата.
„Можеби во јавноста не го зборевме тоа, стварно овој натрпевар знаевме дека ќе биде потежок од тој со Словенија, затоа што носи поголем притисок“, истакна Борко Ристовски.
Листата на стрелци во репрезентацијата на Македонија ја предводеше Филип Кузмановски со шест гола. Капитенот Кире Лазаров додаде четири колку и Дејан Манасков и Филип Миркуловски. Најефикасниот ракометар на средбата беше Црногорецот Чавор со шест гола.
ЕП во ракомет
Група Ц, 2 коло
Црна Гора – Македонија 28:29
Словенија – Германија 25:25
Табела: Македонија 4, Германија 3, Словенија 1, Црна Гора 0.
Идно коло: Македонија – Германија (среда, 18.15 ч.), Словенија – Црна Гора (сред, 20.30 ч.)
Група Д, 2 коло
Чешка – Данска 28:27
Унгарија – Шпанија 25:27
Табела: Шпанија 4, Данска 2, Чешка 2, Унгарија 0.
Идно коло: Чешка – Унгарија (среда, 18.15 ч.), Шпанија – Данска (среда, 20.30 ч.)
Утре на ЕП
Група А, 3 коло
Србија – Исланд (18,15 ч.)
Хрватска – Шведска (20,30 ч.)
Табела: Хрватска 4, Шведска 2, Исланд 2, Србија 0.
Група Б, 3 коло
Франција – Белорусија (18,15 ч.)
Норвешка – Австрија (20,30 ч.)
Табела: Франција 4, Норвешка 2, Белорусија 2, Австрија 0.