Италија сè уште е под импресии од трансферот на Кристијано Роналдо од Реал Мадрид во Јувентус, а во фудбалската федерација вечерва со ждрепка е изготвен и распоредот на натпревари за сезоната 2018/19 во Серија А. Новата трка за „Скудето“ започнува на 18 август и ќе трае до 26 мај догодина. Првата полусезона ќе финишира на 29 декември, втората ќе почне на 20 јануари. Улогата на бранител на титулата ја има „старата дама“, овојпат драстично засилена со ангажманот на португалската ѕвезда.
Во премиерата во новата сезона ќе играат Аталанта – Фросиноне (сабота, 18 август, 18 ч.), а вечерниот термин е резервиран за мечот Болоња – СПАЛ. Колото ќе биде комплетирано наредниот ден (недела, 19 август) во веќе вообичаените термини (12,30 ч., 15 ч., 18 ч. и 20,30 ч.). Мечеви низ шампионатот ќе има и во понеделник од 20,30 ч.
Дербито на првото коло е на „Олимпико“ меѓу Лацио и Наполи, а Роналдо во дресот на Јувентус ќе дебитира на гостувањето во Верона против истоимената екипа. Со гостински настапи во првенството ќе влезат и Интер и Рома, екипи кои се вбројуваат меѓу аспирантите за титулата. „Нероазурите“ ќе излезат на мегдан на Сасуоло додека „волчицата“ ќе игра со Торино. Џенова, пак, на Горан Пандев ја очекува натпревар на „Сан Сиро“ против Милан.
Фокусот во второто коло ќе биде насочен на два стадиона – на „Јуве арена“ ќе допатува Лацио додека Наполи ќе биде домаќин на Милан. Третото коло ја носи пресметката меѓу Милан и Рома во Милано.
„Дерби дела капитале“, односно, фудбалската битка за Рим меѓу Рома и Лацио е во седмото коло, „дерби дела мадонина“ или дуелот меѓу Милан и Интер е во деветтото коло, „дерби дела Италија“, т.е., средбата на Интер и Јувентус е во 15. коло на „Џузепе Меаца“.
Удинезе е единствен, барем засега, од италијанските прволигаши кои во новото првенство ќе влезе со странец на клупата. Кормилото на тимот од Удине му е доверено на Хулио Веласкез кој го наследи Хрватот Игор Тудор. Со нови менаџери во сезоната 2018/19 ќе влезат и Наполи (Карло Анчелоти на местото на Маурисио Сари), Болоња (Филипо Инзаги на местото на Роберто Донадони), Калјари (Роландо Маран на местото на Диего Лопез) и Сасуоло (Роберто де Зерби на местото на Џузепе Јакини).
Серија А
Двојки за 1 коло (18/19 август)
Аталанта – Фросиноне
Болоња – СПАЛ
Верона – Јувентус
Емполи – Калјари
Лацио – Наполи
Милан – Џенова
Парма – Удинезе
Сампдорија – Фиорентина
Сасуоло – Интер
Торино – Рома