Влатко Костов е првиот и засега единствен кандидат за наследник на Илчо Ѓорѓиоски во Фудбалската федерација на Македонија (ФФМ). Нова ТВ од свои извори ексклузивно дознава дека довчерашниот тренер на Ренова аплицирал за претседателската функција преку Општинскиот фудбалски сојуз (ОФС) Тетово.
Вонредната изборна седница на Генералното Собрание на ФФМ, со одлука на УО од 31 јули, е закажана за 1 септември. Истата е свикана по повлекувањето на Ѓорѓиоски поради ангажман во УЕФА.
Костов како активен фудбалер играше за штипска Брегалница, за Локомотив Софија, за Пелистер и за Вардар. По завршување на кариерата беше тренер во Осогово, Саса, Куманово, Брегалница Штип во два наврата, Турново, Работнички, Ренова во четири наврати.
Во сезоната 2009/10 ја освои шампионската титула во домашното првенство со Ренова, екипа со која во 2012 година триумфира и во Куп на Македонија по победата над Работнички (3:1) во неговиот роден Штип. Во 2013 година и во 2014 година го предводеше саудиски Ал Раед.
Шест години (2003-2009) беше асистент во стручниот штаб на младата фудбалска репрезентација на Македонија, од 2009 година до 2011 година беше асистент и во сениорскиот тим чиј в.д. селектор беше во ремито (2:2) против Ерменија во Скопје во квалификациите за ЕП 2012.