Нови 60 Гостиварци ноќеска побарале лекарска помош во болницата, со што бројот на оние со стомачни тегоби се искачи на 450 во последните три дена.
Од Министерството за здравство тврдат дека епидемиолошките и другите спроведени мерки покажале дека не постои поврзаност за конзумирање на храна од еден ист извор.
Утринава од 8 часот екипи на Државниот санитарен и здравствен инспекторат се на терен и прават увид на состојбата во гостиварската болница. Во тек е обработка на податоци по што надлежните институции ќе излезат со соопштение.
Неофицијално, во Институтот за јавно здравје во Скопје донесени се примероци за анализа од пациентите, се очекува да бидат донесени и од водата, по што се очекува да излезат со официјално објаснување за причината. Според директорот на Институтот за јавно здравје треба да се испита бактериолошкиот и радиолошкиот состав на водата, физичко хемискиот и дали евентуални е контаминирана.
„Овие анализи ќе потраат малку повеќе, најмалку 48 часа“, изјави за НОВА Шабан Мемети директор на Институтот за јавно здравје.
Вчеравечер, и од болницата за НОВА изјавија дека не станува збор за труење со храна, бидејќи пациентите не се поврзани, ниту јаделе на исто место. И покрај направената анализа, лекарите се сомневаат во водата за пиење од гостиварскиот водовод, бидејќи анализите од крвта на пациентите не покажале, вирусна, туку асоцирале на бактериолошка инфекција.
„Сите пациенти се со полесни симптоми, дијареа, повраќање, болки во стомак. Третирани се со соодветна терапија и инфузија и ниту еден не е задржан на болничко лекување. Од направените анализи на крвта се гледа дека станува збор за бактериска инфекција, а не вирусна. Но, не успеваме да утврдиме за која бактерија станува збор. Затоа мострите за анализа утре ќе бидат испратени во Скопје, во Институот за јавно здравје. С е сомневаме дека можен причинител е водата за пиење, за што ќе испратиме дополнитлни примероци за испитување исто така во лабораторија во Скопје. “, изјави за НОВА Гојарт Сулејмани, директор на болницата во Гостивар.
Сулејмани вели дека проблемите се појавиле непосредно после дождовите, кога пациенти масовно почнале да бараат лекарска помош.