Истрагата за падот на авионот во кој животот го загуби аргентинскиот фудбалер Емилијано Сала, а пилотот Дејвид Иботсон сè уште се води како исчезнат, исфрла на површина нови детали. Со јавноста ги сподели отсекот за истражување на воздухопловни несреќи на Велика Британија. Но, оттаму воедно нагласуваат дека истрагата не е завршена и дека сите поединости ќе бидат познати по анализа на големиот број на податоци од радарите, по разговорите со сведоци и по прегледување на видео материјалите од подводното снимање при потрагата по авионот.
Досегашните податоци од истрагата укажуваат и на големи оштетувања на малиот авион што пукнал на три дела кои останале поврзани само со кабли. Моторот на леталото е лоцран надвор од трупот, а недостасуваат и делови од крилата и од опашката. Авионот, се вели понатаму во извештајот, пред падот не се движел праволиниски туку неколку пати „пропаѓал“.
Пилотот Иботсон двапати побарал дозвола за спуштање на „пајперот“ на помала висина поради намалена видливост што била предизвикана од магла. Во моментот на несреќата, авионот за една минута загубил 2.000 метри од висината и паѓал со 144 км./ч.
Младиот аргентински напаѓач загина во пад на авионот „Пајпер Малибу“ со ознака Н26ДБ на летот од Нант кон Кардиф на 21 јануари. Леталото исчезна од радарите набрзо по полетувањето и беше пронајдено по 13 дена на дното на Ла Манш во приватна истрага што ја организира семејството на фудбалерот и пријатели.
Од остатоците на авионот беше извлечено телото на Емилијано Сала и по направената обдукција беше кремирано во неговиот роден град Прогресо, во провинцијата Санта Фе, на 583 килоиметри од Буенос Аирес.
Отсекот за истражување на воздухопловни несреќи откри дека пилотот Дејвид Иботсон, по чие тело сè уште се трага, не поседувал дозвола за комерцијални летови туку само за приватни. Тоа упатува на заклучок дека Иботсон не можел да превезува било кого со финансиски надомест.
Неговата дозвола за приватни летови важела за САД и за Велика Британија, па дополнително се утврдува дали таа се однесувала и на Европската унија или во нејзини рамки можел да врши летови за пари. Дневникот што го водат пилотите е загубен, па истрагата не може точно да утврди колку часови Иботсон минал во воздух во последниот месец пред кобниот лет. Прелиминарните податоци укажуваат на вкупно 3.700 часа лет во неговата пилотска кариера.