„Супер трансфери во ЧСМ Букурешт“ е насловот на веста на официјалната интернет страница на романскиот клуб во делот на женската секција. Европскиот шампион од сезоната 2015/16 година ќе биде уште посилен од наредната. Ростерот на Данката Хеле Томсен ќе биде збогатен со три одлични ракометарки од ЖРК Вардар. Нови „тигарки“ (прекар на клубот) ќе бидат Јованка Радичевиќ, Андреа Лекиќ и Драгана Цвијиќ кои денеска беа промовирани пред тамошната јавност.
„Да се биде дел од најдобриот тим и да се игра покрај најдобрите е секогаш предизвик. Среќна сум. Моите амбиции се големи како и на клубот. Имав прилика да играм против ЧСМ Букурешт и можам да кажам дека беше тешко. Навивачите прават извонредна атмосфера што дополнително ја компликува работата за ривалите. Луѓето овде се луди по ракомет. Мислам дека ниту една гостинска екипа нема да се наигра во Букурешт“, истакна Црногорката Радичевиќ која во наредните две сезони ќе настапува во дрес со број 44.
Драгана Цвијиќ, пак, призна дека и лани била блиску до трансфер во ЧСМ Букурешт, а, сепак, одлучила да остане уште една сезона во ЖРК Вардар. Овојпат реши да ја прифати понудата од Романија во пакет со нејзините клупски колешки во „црвено-црниот“ дрес.
„Изборот на новата дестинација во кариерата ме прави среќна. Повторно ќе бидат дел од силен тим со највисоки амбиции. Амбиентот овде е неверојатен и презадоволна сум што ќе продолжам во средина што живее за ракометот. Моја цел е трофејот во Лигата на шампиони. Затоа и доаѓам во ЧСМ Букурешт. Убедена сум ќе успееме со оглед на составот со кој ќе располага екипата од наредната сезона“, рече српската репрезентативка, Цвијиќ, новата „седумдесетидвојка“ на тимот од романската престолнина, која потпиша едногодишен договор.
Задоволство од соработката со Букурешт не криеше ниту нејзината сонародничка и репрезентативна колешка, Андреа Лекиќ. Српскиот среден бек ја почна кариерата во МРК Белград по што почна интернационална кариера во Крим. Во Љубљана мина четири години (2007-2011), наредните две ги мина во Ѓер од Будимпешта (2011-2013) пред да пристигне во ЖРК Вардар, а сега се обврза на верност кон ЧСМ Букурешт до 2020 година.
„Ова е еден од најголемите клубови во Европа чија цел во секоја сезоната е титулата во Лигата на шампиони што се поклопува и со моите желби. Фактот што ќе продолжам да се надградувам покрај многу квалитетни ракометарки ме исполнува и прави среќна. Со добар дел од нив се познавам добро и сигурна сум дека ќе немам проблем да се вклопам во средината. Сум слушнала многу убави работи и за градот и нетрпение чекам да го запознам“, рече Лекиќ на промоцијата.
Цвијиќ, Радичевиќ и Лекиќ и официјално заминуваат од Скопје по завршување на оваа сезона, но трите се едногласни во размислувањата и намерите да се разделат со ЖРК Вардар како клупски шампионки на Европа.