Во саботата (18 јуни) во кафе-книжарницата Буква се одржа првиот од серијата настани посветени на поезијата под наслов „Поетска епизода #1 | Новите деца во градот“. Настанот го модерираа младите поети Ивана Јовановска и Андреј Медиќ Лазаревски, а своја поезија читаа вкупно 9 поети, некои познати, а некои помалку познати на поетска сцена во Македонија.

Според Ивана и Андреј, првата епизода од серијата настани помина во одлична атмосфера благодарејќи на големиот интерес кој настанот го предизвика, како и целокупната поддршка која ја добиле, како од кафе-книжарницата Буква, така и од публиката. Првото од серијата поетски настани кои ќе се организираат во Скопје подразбираше читање на авторска поезија во два круга со конкретно определено време за младите поети. Младите организатори потенцираат дека се отворени кон менлив и флуиден карактер на идните настани, дека се фокусирани на различни аспекти од книжевноста кои ќе бидат застапени, но и дека допрва ќе растат заедно со процесот на градење на овој отворен концепт на настан. Благодарни се на конструктивните сугестии и поддршката од поетите и посетителите, кои имаат важна улога во она што Ивана и Андреј имаат намера да го водат со овој настан.

Овој настан е показател, според нив, дека секогаш постои расположение и интерес за културни настани во градот, и дека тие секогаш се потребни и посакувани. Настаните од областа на книжевноста, пак, имаат посебна важност во градењето на културната содржина на Скопје и градењето на некаков континуитет и традиција во нивно одржување ќе има позитивно влијание за книжевната публика.

Поезијата како форма добива се поголема популарност и актуализација, а овој настан беше обид нејзината зголемена популарност да добие некаква конкретна форма во вид на настан кој ќе се фокусира на пристапот на младиот автор кон поезијата и стихот од повеќе аспекти.

Настанот беше организиран во соработка со кафе-книжарницата „Буква“, неформалното здружение за култура „Култура Бета“, а публиката можеше да ја проследи и чуе поезијата на Андреј Ал-Асади, Благица Трајкоска, Марија Велинова, Софија Тодороска, Павлина Атанасова, Сатја Александар Давитков, Ива Петреска, како и на модераторите на настанот Ивана и Андреј.

M.T.