Обезбедувањето на Никола Груевски не дозволило судскиот доставувач да му ја предаде поканата за денешната јавна седница во Апелација во која треба да се одлучува дали бомите ќе бидат доказ во случајот „Титаник“, случај кој СЈО го отвори за изборните нерегуларности.
Како што кажа судијката Лилјана Иванова Шопова, Груевски повеќе пати бил баран во неговиот дом, но обезбедувањето не го пуштало да ја врачи поканата, а ниту тие не сакале да ја земат.
Груевски бил и телефонски повикан, поради што судот констатира дека обвинетиот е уредно повикан на денешната јавна седница.
Обвинетите во „Титаник“ бараат обвинението да не биде прифатено бидејќи претседателот Ѓорѓе Иванов ги амнестирал и дополнително барале 1063 телефонски разговори да не бидат доказ во постапката за изборните нерегуларности.
Адвокатот на Никола Груевски, Димитар Дангов, рече дека ако судот ги прифати бомбите, ќе се направи силно зло до степен на срам кон граѓаните и правниот поредок.
Адвокатот Боро Тасевски, пак, рече дека ако се прифатат бомбите, ќе се прекршат Конвенцијата за човекови права, Законот за следење на комуникациите и Законот за кривичната постапка.
Специјалната јавна обвинителка Лиле Стефанова рече дека првообвинетиот Никола Груевски знаел дека го прислушуваат затоа што користел кратенки и ги предупредувал соговорниците. Таа рече дека бомбите треба да бидат користени како доказ за заштита на јавниот интерес.
СЈО пак и понатаму останува на жалбата дека прислушуваните разговори не се незаконски прибавени и тие можат да бидат доказ во постапката.
На јавната седница за овој предмет кој е за изборни нерегуларности присутни се седум адвокати на 20 – те обвинети како и обвинетите поранешни министри Јанакиески и Јанкулоска.
Апелација расправа по жалба, откако Кривичниот суд на 20 октомври годинава ги отфрли „бомбите“ како доказ за „Титаник“.
Предметот „Титаник“ е прв случај што го обелодени СЈО, а се однесува на десетина дела поврзани со изборни нерегуларности, а обвинети се поранешни функционери меѓу кои и Никола Груевски, Мартин Протугер, Кирил Божиновски, Миле Јанакиески и Гордана Јанкулоска. Тие се осомничени од СЈО за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања во 2012 година.