Дејствијата на обвинетиот Драган Павловиќ-Латас во предметот на СЈО „Тотал“ не можат да се подведат под кривично дело „даночна измама“, затоа што неговите дејствија се строго определени како „затајувачки дејствија“ изјави за МИА обвинителот од Специјалното јавно обвинителство, Гаврил Бубевски по тврдењата од невладината организација „Сите за правично судење“ дека делото на новинарот Павловиќ може побрзо да застаре и да се преквалификува како даночна измама.
„ Дејствијата на Драган Павловиќ Латас се отсликуваат во она што е „даночното затајување“ и постапката се води за „даночно затајување“. Застарувањето за тоа кривично дело за кое што се гони обвинетиот почнува да тече од времето на последното дејствие. Последното дејствие е 2015 година, даночната 2015 година, и релативен рок на застареност е 20 години, а апсолутен рок на застареност е 40 години. Значи тогаш застарува апсолутно ова кривично дело што не може да трпи измени и да биде „даночна измама“ затоа што е сосема друго, рече обвинителот Бубевски.
Тој додава дека двете кривични дела се дивергентни – различни во суштината.
Драган Павловиќ-Латас е обвинет во предметот „Тотал“ за давање на лажни податоци во завршните сметки и даночните пријави на „Тотал маркетинг” ДООЕЛ, „Тотал медија центар” и „Медијамакс” . На овој начин тој затаил данок во износ од 121.414 евра, а лично како физичко лице затаил 63.032 евра.
И за предметот Труст во кој се осудени Сеат Кочан и Владимир Авирович, Бубевски рече дека застарувањето се смета од највисоката можна казна што може да се изрече.
„Највисоката за тој предмет е 15 години во времето на извршување. Значи, за гонење за која што може да се изрече казна од 15 години казна затвор застарувањето е исто 20 години затоа што е поведена постапката во тие 20 години, застарувањето е двојно – 40 години. Значи, „Труст“ би застарел, евентуално во 2051 година. И апсолутно нема стравување од застарување на тие два предмети, појаснува обвинителот Бубевски.
Од коалицијата „Сите за правично судење“ вчера изјавија дека може да се направи преквалификација на делото „Тотал“ кое според обвинението повеќе се поклопува со новиот член– даночна измама, за кое се предвидени пониски казни. Исто така изјавија дека делото може да застаре.