Обвинителката Вилма Русковска ја потврдува веродостојноста само на првата слика од објавениот записник, но останатите заклучоци и коментари на авторот нема да ги коментира – изјавија од Обвинителството за гонење на организиран криминал и корупција за НОВА.
Порталот Инфомакс објави копија од Записник од распитот на Камчев од 2 мај 2019 г. во Основното јавно обвинителство за гонење организиран криминал и корупција. Објавена е копија од само една страница од документот, а во текстот на порталот се пренесуваат и делови за кои исто така се тврди дека се од документот, но нивната содржина не може да се провери, зашто е објавена само копија од првата страница.
Од Обвинителството истражуваат од каде протекол документот – бидејќи како што соопштија „откривањето на доверливи информации од страна на поединци претставува опасност и штета за севкупниот општествен систем и е кривично дело“.
Од Обвинителството за организиран криминал за НОВА изјавија дека копија од записникот од распитот на Камчев бил доставен до Кривичниот суд.
„Оригиналните списи од предметот ги поседува Обвинителство за организиран криминал, а копија од нив беше доставена само до Судот“ потврдија од Обвинителството.
Објавениот документ не е оригинален, туку е копија.
„Со протекување ваков вид документи се повредува пресумпцијата на невиност, се загрозуваат животи на инволвираните лица и воопшто сe отежнува текот на постапката, наведоа во писменото соопштение од Обвинителството за гонење на организиран криминал и корупција.
Обвинителство: Со протекувањето документи се отежнува постапката и се загрозуваат животи
НОВА побара коментар и од претседателот на Суот Џолев, но до овој момент тој не одговори.
Во објавената копија може да се прочита дека Камчев пред Русковска тврдел дека историјатот на контактите со Бојан Јовановски и Зоран Милевски (осомничени во „Рекет“) започнува од септември 2018 г. кога Боки 13 првично му нуди „фиктивен проект за продажба на права за некаков тип на Fashion Mall“. На вториот состанок, според Камчев, Боки 13 донел „тип на договор кој беше потпишан од директорот на таа компанија за франшиза, а тоа е синот на обвинителката Катица Јанева“. Камчев вели дека му биле побарани 4 милиони евра за „ноу-хау“ и дека тој сфатил оти станува збор за фиктивен проект, па го одбил.
Следувал и втор обид од Јовановски, овој пат да му продаде „ексклузивна лиценца за старечки домови, од некоја европска асоцијација“, за која Камчев би добил ексклузивитет за територијата на Скопје.
„Јас сфатив дека се работи за земање рекет од страна на Бојан, затоа што тој претходно веќе измамил двајца луѓе со истиот договор за лиценца за старечки домови“, се цитира Камчев во објавениот Записник и притоа наведува дека мисли на Силјан Мицевски од Битола и роднина на Фијат Цаноски од Струга.
Во текстот на „Инфомакс“ има и други цитати од Записникот, но нивната содржина не може да се провери зашто е објавен факсимил само од првата страна на документот.
Од Кривичниот суд не сакаат да ги коментираат наводите од Обвинителството за гонење организиран криминал и корпуција дека копија од записникот од распитот на Камчев, а кој беше објавен во јавноста бил доставен до Судот.
Од таму за НОВА велат дека очекуваат истрагата да покаже како документот протекол во медиумите.
„Истрагата треба да покаже дали записникот протекол од некоја институција која го имала документот по службена должност, како што се Обвинителството и судовите, или од некои од лицата инволвирани во случајот“, велат од Судот. Оттаму додаваат дека без оглед од каде протекле документите, ако биде откриен, сторителот ќе одговора за оддавање службена тајна по член 360 од Кривичниот Законик.
„Добро е да се открие кои се мотивите за ваквите објави и кој има корист. Истрагата нема сигурно“ коментираат од Кривичен за НОВА .
Премиерот Заев и министрите Шеќеринска, Димитров и Ременски најавија тужба против порталот за клевета.
Заев најави тужба за клевета: Ни јас ни високите функционери не сме вмешани во „Рекет“
„Како што видов рано изутрината објавена е само една страница од записникот, а потоа се прераскажува, што претставува сериозна манипулација. Секогаш сакам да ги охрабрам новинарите да истражуваат, да доловат сѐ што е важно за јавноста, но да прават манипулации, за тоа има одговорност. Јас лично, а верувам заедно со мене Радмила Шекеринска, Никола Димитров, Фросина Ременски, сите што сме споменати. Ќе ги повикам заедно со мене да поднесат тужба за клевета и таму да ги отвориме документите и на јавноста да ѝ докажеме дека лаже новинарот кој го лиферува ваквиот запис, рече Заев.
На прашањето дали ќе побара политичка одговорност доколку се утврди дека од политичарите има вмешани во случајот „Рекет“ или ќе чека да поднесат политичка одговорност, Заев нагласува дека над одговорноста и правдата не смее да биде никој.
Во случајот Рекет кој го води обвинителката Вилма Русковска досега се осомничени три лица и за сите е одреден притвор: Бојан Јовановски, Зоран Милевски и специјалната јавна обвинителка Катица Јанева.
Обвинителката Руковска најави дека истрагата ќе продолжи. „Ќе видиме каде ќе не одведе – кажа обвинителката Русковска откако Кривичниот суд на специјалната јавна обвинителка Катица Јанева и одреден притвор.
Таа исто така најави дека продолжува и финаниската истрага за Рекет и дека во овој момент не се знае колку пари од рекетот точно завршиле кај Јанева.