Постапувајќи по кривичната пријава поднесена од Министерството за внатрешни работи против 12 лица, надлежен јавен обвинител од Основното јавно обвинителство за гонење на организиран криминал и корупција, врз основа на расположливите докази донесе наредба за истражна постапка против четири лица за кривично дело „злосторничко здружување“ и „поткуп“, додека останатите пријавени за „злоупотреба на службената положба“ се опфатени во скратена постапка.

Причина за истрагата се сознанијата дека на граничниот премин Табановце група полициски службеници на организиран начин барале и примале мито поради што по наредба на обвинител беше спроведена полициска рација. Притоа беа претресени 27 полициски службеници, како и службените простории на граничниот премин и домовите на дел од пријавените и при што беа приведени девет полициски службеници.

Случајот, инаку, започнува на почетокот на 2020 година, кога командир на полициската служба за гранични проверки, двајца виши полицајци во истата служба и еден полициски службеник, создале група со цел да примаат поткуп, за што како што наведе Обвинителството во денешното соопштение, предвидената казна е затвор од три години или повеќе години. Првоосомничениот, најпрвин како раководител на смена, а потоа и како командир на полициската служба за гранични проверки ги распоредувал или влијаел да бидат распоредени останатите тројца осомничени на работни места во кабини каде што има поголема фреквенција на патници за влез и излез од државата.

Тројцата, како полициски службенци кои вршеле пасошка контрола имале задача да бараат и примаат подарок од 5, 10, 20 или 30 евра за себе и за првоосомничениот за да пропуштат возила што немале зелен картон за влез и за излез во државата, немале полномошно за управување со возилата, немале патни исправи, возачки дозволи или друг задолжителен документ. Така, од почетокот на 2020 година сѐ до 25.12.2022 година во повеќе наврати примиле поткуп, а од примените парични средства секој месец на првоосомничениот му давале по 150 евра.

На 25 декември при спроведените претреси кај наведените службеници се пронајдени предмети, подароци и поголема сума на пари за кои постојат сомненија дека потекнуваат од примениот поткуп. Па така, кај четвртоосомничениот се пронајдени 15.795 евра во банкноти во апоени од по 5 евра, 10 евра и 20 евра и 30 швајцарски франци, додека кај првоосомничениот се пронајдени 210.000,00 денари во апоени од по 1.000 и 2.000 денари. Воедно, во зградата на ГП Табановце во просторијата – кујна во метален сад сместен во висечки орман се пронајдени 420 евра и 20 франци што осомничените ги сокриле како пари примени тој ден како поткуп.

Вчера надлежниот обвинител побара притвор во траење од 8 дена за две лица,  додека за петмина за кои се води скратена постапка предложи мерки за обезбедување на присуство.