Од денеска почнуваат да функционираат вкупно 14 пунктови за тестови за коронавирус на територијата на целата држава. Материјали и брисеви во Скопје ќе може да се дадат во поликлиниките „Чаир“ и „Јане Сандански“, а во текот на денот ќе бидат објавени информации и останатите места ширум Македонија.
„Ќе се тестираат граѓани по епидемиолошки индикации и со закажување по претходна најава кај матичен лекар кој ќе треба да пополни алгоритам што ќе укаже на тоа дали граѓанинот треба да биде тестиран или не. По вчерашниот координативен состанок со Здружението на матичните лекари тие целосно се вклучија во поддршка на овој систем на идентификација на рано откривање, зголемување на пристапот на пациентите односно граѓаните прво до дијагностика, а потоа и до спроведување и извршување на тестовите“, соопшти вчера на прес-конференција министерот за здравство, Венко Филипче.
Повтори дека кол-центарот е веќе во функција од викендот и оти за време на работните денови ќе работи и со зголемен капацитет на луѓе со цел да се избегне чекањето.
Во текот на денешниот ден, како што најави Филипче, по истекувањето на 14 дена од воспоставување на дијагнозата кај шест пациенти ќе се земе контролен брис.
„Пет од нив се наоѓаат во добра состојба, а кај пациентката која имаше влошување на состојбата и беше поставена на респираторна машина, таа е во непроменета состојба во однос на неколкуте претходни денови“, рече Филипче.
За воведувањето на полициски час, министерот Филипче појасни дека тој не важи за здравствени работници со соодветен терк, припадници на МВР, на Армијата.
„За сите други компании што мора редовно да ги спроведуваат обврските во интерес на граѓаните, како и производствените капацитети за храна кои имаат и работно време во текот на ноќта, донесен е заклучок дека самите ќе издаваат пропусници кога имаат вработени во три или четири смени и согласно тие пропусници тие ќе може да се движат кон нивните работни места“, рече Филипче.