ЦИВИЛ МЕДИА од раните утрински часови на 25 октомври известува за вонредните парламентарни избори во Србија, со оригинални теренски информации од Белград, фотографии, видеосведоштва, анализи на излезноста и ексклузивни изјави за регионалното значење на изборите. До пладне, редакцијата објави пет прилози во рамките на специјалното известување „СРБИЈА ГЛАСА“.
Првиот извештај, објавен во 8:02 часот, донесе информации и фотографии од колумнистот и специјален известувач Марко Маневски, кој јави дека граѓаните во Блок 45 во Нов Белград чекале во редици уште од 4 часот наутро, три часа пред отворањето на избирачките места.
Во следниот теренски извештај, Маневски информираше за доцнења со почетокот на гласањето на повеќе локации, недостиг од изборна опрема и бавно одвивање на процесот. Истовремено, ја опиша атмосферата на трпеливост и солидарност меѓу граѓаните, кои чекале со кафе, кифлички и книги.
Особено впечатлива беше забелешката на еден гласач: „Си земав бурек да појадувам додека чекам. Па нема ваљда сендвич да јадам!“
Во првиот видео разговор од Белград, Маневски ја опиша атмосферата како референдумска. До 10 часот излезноста достигна 19,8 проценти, според ЦРТА, речиси двојно повеќе отколку во 2023 година. Извештајот го опфати и големиот интерес за гласање во дијаспората, вклучително и долгите редици во Њујорк.
Во својата анализа за ЦИВИЛ МЕДИА, Љубомир Костовски ја разгледува високата утринска излезност, која до 11 часот достигна 27,3 проценти, наспроти 15,1 процент во истиот период во 2023 година. Анализата го отвора прашањето за можните политички последици од ваквата мобилизација, без да го прејудицира изборниот исход.
Регионалната димензија е опфатена и во ексклузивните изјави на Џелал Хоџиќ и проф. д-р Оливер Андонов. Двајцата соговорници оценуваат дека евентуалните политички промени во Србија би можеле да имаат значајни последици за Западен Балкан, особено за Северна Македонија.
ЦИВИЛ МЕДИА продолжува со директни теренски известувања, видеоразговори и анализи во текот на изборниот ден, комбинирајќи оригинално новинарство со информации од независни набљудувачи и релевантни извори.