Во февруари беше суспендиран на четири месеци, минатата недела ги договори личните услови, мина лекарски прегледи и од денеска е нов член на Милан. Хакан Чалханоглу (23) реши да го напушти Баер Леверкузен и ја прифати четиригодишната понуда од „Сан Сиро“ вредна 20 милиони евра и дополнителни четири во вид на бонуси за ставање крај на сагата околу наредната станица во неговата кариера.
„Зад мене се четири тешки месеци. Среќен сум што, конечно, завршија и што пристигнав во Милан. Благодарност за укажаната прилика да играм на „Сан Сиро“. Ова е голем клуб со голема традиција и со играчи во минатото како Бекам, Кака, Гатузо, Роналдињо, Малдини. Ќе дадам максимум од моите можности за клубот, за екипата, за навивачите. Ме чека многу работа“, рече Чалханоглу.
Светската фудбалска асоцијација (ФИФА) во февруари го суспендира Чалхаоглу на четири месеци за прекршување на договор од 2011 година. Пред казната одигра 15 меча за „фармацевтите“ во Бундеслигата и уште шест во Лигата на шампиони со ефект од седум гола и седум асистенции.
„Посакувам да имаме добар почеток на сезоната. Нè чека и важен натпревар во Лига Европа. Се надевам дека ќе бидеме меѓу најдобрите три екипи во Серија А. Убеден сум дека можеме“, дополни турскиот интернационалец.
Чалханоглу е шесто летно засилување на Милан. Меѓу „росонерите“ претходно се придружија Фабио Борини, Матео Мусачо, Фрeнк Кеси, Андре Силва и Рикардо Родригез.