Изборната кампања за Локалните избори 2021 што се закажани на 17 октомври ќе почне утре (27 септември) и ќе трае 20 дена. Учесниците на изборите, политичките партии и независните кандидати веќе го најавија почетокот на кампањата, како и активностите што ќе следуваат.

Најголем дел од кандидатите за градоначалници и советници веќе имаа неформални средби со граѓани и претставување на своите програми на социјални мрежи. Кампањата завршува на 15 октомври на полноќ. Вториот круг избори ќе се одржи на 31 октомври, а кампањата за втор круг ќе трае до 24 часот на 29 октомври.

Државната изборна комисија (ДИК), претходно, потврди 303 листи за градоначалници и 567 за советници. Распоредот на кандидатите на гласачкото ливче беше утврден со ждрепка на седница на ДИК, без присуство на претставници на политички партии, коалиции и групи избирачи поради актуелната ситуација со ковид-19.

Од поголемите партии, на Единствената листа на кандидати, Демократската унија за интеграција е под број 3, Алијанса за Албанците под број 5, ВМРО-ДПМНЕ и коалицијата „Обнова на Македонија“ под број 7, Социјалдемократскиот сојуз на Македонија под број 9, Алтернатива под број 10, Демократската партија на Албанците под број 11, БЕСА под број 16, итн. На листата се наоѓаат и помали партии, коалиции, а има и голем дел независни кандидати.

На Локалните избори закажани за 17 октомври 2021 ќе може да гласаат 1.824.864 милиони граѓани. Избирачкиот список беше заклучен на седница на ДИК во петокот согласно роковникот. Од вкупниот број на гласачи, во изводите на Избирачкиот список се запишани 1.740.147. Во Посебните извори од Избирачкиот список се запишани 82.461 лица, кои се наоѓаат на привремена работа или престој во странство, согласно евиденцијата на надлежниот орган, 1.899 гласачи кои на денот на изборите се наоѓаат во затвор или во притвор, 351 лице е во установи за вонсемејно сместување и шест гласачи кои, согласно евиденцијата на Министерството за труд и социјална политика, се запишани како раселени лица.

На Локалните избори 2021 за првпат ќе бидат применети терминали за читање отпечатоци од прсти на гласачите за утврдување на нивниот идентитет и за избегнување на евентуални неправилности при гласањето.

Како и за Парламентарните избори 2020, и годинава изборите ќе се одржат со спроведување мерки за заштита од ковид-19 и ќе бидат формирани посебни изборни комисии за лицата кои ќе искажат интерес за гласање, а на денот на изборите ќе бидат во изолација или позитивни на коронавирусот.