Рочиштето за случајот „Траекторија“ на СЈО попладнево продолжи, откако судијата Горан Бошевски соопшти дека е одбиено како неосновано барањето на одбраната за изземање на судечкиот совет.
На ова реагираше адвокатот Еленко Миланов оценувајќи дека одбивањето на барањето за изземање на судечкиот совет и отфрлањето на барањето за изземање на претседателот на Кривичен суд Иван Џолев и судии од Апелација е спротивно на правото.
Обвинителката на СЈО, Лиле Стефанова рече дека денеска треба да бидат изнесени материјални докази во кои дел се и аудио-снимки. Имајќи предвид дека снимките во мал дел содржат и приватни разговори Стефанова побара повлекување на некои разговори.
Одбраната на обвинетите во предметот на СЈО „Траекторија“ на почетокот на денешното рочиште побара изземање на судечкиот совет, на претседателот на Кривичен суд Иван Џолев и на судии од Апелацискиот суд.
Адвокатот Еленко Миланов рече дека изземањето се бара поради информации изнесени од специјалната јавна обвинителка Катица Јанева во телевизиско интервју дека во прислушуваните разговори со кои располага СЈО има и судии.
Од истата причина одбраната на обвинетите бараше изземање на судечките совети и на раководствата на Кривичниот и на Апелацискиот суд во уште неколку предмети на СЈО.
Во „Траекторија“ обвинети се поранешниот премиер Никола Груевски, поранешниот вицепремиер Владимир Пешевски, екс-министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски, кои денеска дојдоа во Кривичниот суд.
Тие се товарат дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатите Миладиновци – Штип и Кичево – Охрид ги искористиле и пречекориле своите овластувања. Според СЈО, со противправното дејствување на обвинетите кинеската компанија „Синохидро“ се стекнала со имотно-правна корист од 155.117.256 евра, а износот на штета претставува разлика меѓу износот на цена што како држава ја плаќаме на „Синохидро“ и цената што оваа компанија им ја плаќа на подизведувачите.
Адвокатите, пак, тврдат дека ќе докажат оти со околностите и податоците со кои располагале обвинетите при носење на одлуките не е направено противзаконско дејствие.