Машката одбојкарска репрезентација на Македонија ја нанижа и петтата победа во Европската лига. Националите го совладаа и Азербејџан со 3:0 (по сетови: 25:20, 25:19, 25:21) во натпревар од второто коло на вториот турнир во групата А што викендот се игра во Тирана.
Час и 21 минута им беа потребни на „црвено-жолтите“ во „Олимпик парк“ во албанската престолнина за убедливо решавање на Азербејџанците по вторпат во само седум дена. Како најдобар играч статистиката овојпат го исфрли Марјан Урдов кој забележа 14 поени, три повеќе од Филип Маџунков кој, пак, имаше и најмногу успешни блокови на мрежа (4).
Второто коло во Тирана, вкупно петто во А групата, ќе биде комплетирано вечерва по одигрување на дуелот меѓу Албанија и Шведска.
Македонија утре попладне (18 ч.) ќе игра против домашната селекција за заокружување на групната фаза. „Црвено-жолтите“ се лидери на табелата со максимален ефект (пет победи во истотолку одиграни средби) и на две кола до крајот обезбедија пласман на Фајналфор во Гентофте каде покрај Данска и Украина ќе настапи и подобрата второпласирана репрезентација од двете конкуренции.