Јошко Миленкоски и официјално, како што беше најавено, е нов селектор на машката одбојкарска репрезентација на Турција. Промоцијата се случи денеска во просториите на Федерацијата во Анкара и на позицијата, според договорот, ќе остане до Олимпијадата во Токио во 2020 година.
„Турција е една од најпрестижните одбојкарски селекции во Европа. Укажана ми е голем чест. Среќен сум и задоволен што изборот на Бордот на директори на турската федерација падна на мене. Благодарам за довербата“, рече Миленкоски по свеченото потпишување на договорот.
Веќе оваа година Турција ја очекуваат еден куп активности. За предизвиците е свесен Миленкоски кој уште од сега најави пеколни подготовки за што подобро претставување на големите одбојкарски настани.
„Нè очекуваат многу мечеви во 2017 година. Ќе играме на Европското првенство во Полска, ќе бидеме дел од Светската лига, а тука се и квалификациите за Светското првенство. Пред нас е многу работа. Мора добро да се подготвиме и верувам дека резултатите нема да изостанат“, додаде Миленкоски.
Покрај работата со репрезентацијата, Миленкоски останува да ја води и екипата на Малије Мили Пјанго. Турција денеска доби и нов селектор на женската репрезентација во Италијанецот Џовани Гвидети.