Адвокатскиот тим на Горан Грујевски ја обжали одлуката на Судот кој го прифати предлогот на Специјалното јавно обвинителство за притвор од 30 дена.
Кривичниот совет е тој кој ќе решава по жалбата. До Основниот суд Скопје 1, СЈО денеска ги праќа и барањата за останатите осомничени меѓу кои е и поранешната министерка Гордана Јанкулоска.
Во вчерашното соопштение од Судот се вели:
Судија на претходна постапка при Основниот суд Скопје 1 – Скопје, постапувајќи по предлог на Обвинителството за гонење кривични дела поврзани и кои произлегуваат од незаконското следење на комуникациите за определување мерка притвор за осомничениот Г.Г., поднесен во судот во текот на вчерашниот ден, по денешното сослушување на осомничениот кој самиот се јави во судот, а во присутво на негов бранител и обвинител од наведеното обвинителство, донесе одлука со која го прифати предлогот на обвинителството за определување на мерка 30 дневен притвор.
Ваквата разврска доаѓа откако СЈО вчера отвори нов случај под името „Тврдина“ за уништување на опрема за следење на комуникациите.
Во „Тврдина” се осомничени петмина меѓу кои и екс-министерката за внатрешни работи Гордана Јанкулоска. Осомничените се обвинети за злоупотреба на службената должност и за фалсификување на документи. Меѓу осомничените се и тројца началници од МВР и службеник-документарист.