Судијката Татјана Михајлова од Основниот суд Скопје не го одложи денешното рочиште за насилството и нарачаните шамари за поранешниот градоначалник на Општина Центар, Андреј Жерновски.
Михајлова прифаќајќи го барањето на обвинителката Фатиме Фетаи, која предупреди дека никогаш нема да се соберат сите обвинети и судењето да почне донесе решение да го издвои Димче Крстев кој утрово беше стражарно приведен по наредба на Михајловска.
Оваа постапка на Михајлова предизвика изненадување и вознемиреност кај првообвинетиот Никола Груевски и кај сите останати 13 обвинети и адвокатите кои денеска дојдоа комплет.
Михајлова му рече на Крстев: „Одете си дома Димче ако не ви е добро. Слободен сте. Ќе бидете повикан во друга постапка против вас, за истото обвинение”.
Михајлова рече дека против нејзината одлука Крстев да се издвои од оваа постапка и судењето за насилствата и нарачаните шамари за Жерновски, нема право на жалба.
По оваа одлука на Михајлова, адвокатите на обвинетите побараа одложување на главната расправа. Во моментот на нивно барање судијката даде пет минути пауза.
По паузата треба да продолжи образложувањето на адвокатите за одложување на почетокот на главната расправа.
Во судот освен Груевски, присутни се и поранешниот министер за транспорт и врски Миле Јанакиески, пратеничката Даниела Рангелова и останатите обвинети во овој случај. Присутни се и Андреј Жерновски и Саша Богдановиќ како оштетени лица во овој случај
Претходното рочиште беше одложено поради тоа што Димче Крстев и Милан Андоновски не беа присутни на судењето.
Овој случај се однесува на протестите во оваа општина против, како што велеа тогаш демонстрантите, рушење на црквата Свети Константин и Елена. Протестите резултираа со демолирање на општинската барака, упад на демонстранти во седница на советот и упатување закани кон советниците.
Според објавената прислушуван разговор што го објави Зоран Заев, протестите биле во организација на ВМРО-ДПМНЕ, а Груевски побарал еден од демонстрантите да му удри шамар на градоначалникот, Андреј Жерновски.