Денешната судска расправа за случајот “Сопот” е одложена. Овој пат одбраната побара повеќе време за подготовка, бидејќи судскиот совет се промени и обвинението е веќе во рацете на Специјалното јавно обвинителство.
Адвокат Вулнет Пачуку од судијката Дијана Груевска-Илиевска побара повеќе време за подготовка на одбраната. Судијката предложи за рочиштето закажано за следната недела да бидат сослушани сведоците во случајот за да се забрза постапката, а обвинителот Бурим Рустеми од СЈО се согласи со барањата на одбраната и го напушти судот од предниот влез, без да даде изјава за медиумите.
На следното сослушување ќе се повика да сведочи Рамадан Бајрами. Не е исклучено дека одбраната предлага сведок дури и за поранешната министерка за внатрешни работи, Гордана Јанкуловска и за поранешниот секретар за разузнавање, Сашо Мијалков, кои во еден од прислушуваните разговори што во 2015 година ги објави тогаш опозицискиот СДСМ, односно во „25. бомба“ разговараат за случајот „Сопот“ и за тоа каква пресуда треба да биде донесена против обвинетите.
Во „Сопот“ жители од ова село се обвинети за тероризам, односно за поставување мина на пат на која нагази теренско возило на НАТО со полски војници и со наши државјани. Загинаа двајца војници и еден македонски граѓанин. За тоа дело, 11 лица беа осудени на затворски казни. Случајот подоцна беше вратен на повторно судење, кое постојано се одложува.
СЈО овој случај го побара од Обвинителството за организиран криминал и корупција во ноември минатата година, а му беше предаден на почетокот на јули годинава.