Предлог на закон за изменување на Изборниот законик по скратена постапка e единствената точка на дневниот ред на собраниската седница експресно закажана за денеска во 16 часот.
Предлог доаѓа од пратеникот Талат Џафери. Се однесува на бришење на членовите 82 и 83 од Изборниот законик, во кој 5. јуни е дефиниран како датум за избори и се предвидени ограничувања на медиумите во однос на предизборната и изборната кампања.
Претседателот на Собранието Трајко Вељаноски, повикувајќи се на денешната одлука на Уставен суд за времено запирање на сите изборни дејствија, за денеска во 16 часот ја закажа 101-та седница.
„Како претседател на Собранието на Република Македонија, имајќи го во предвид решението на Уставниот суд, У.бр.104/16 од 18 мај 2016 година, ја информирам македонската јавност дека врз основа на сопствените надлежности дефинирани со Уставот на државата, за денес, 18 мај 2016 година во 16 часот ја закажав 101 седница на Собранието на Република Македонија. Исто така, сакам да го изразам своето длабоко уверување дека натамошниот развој на демократските процеси во Република Македонија најдобро може да се оствари во Парламентот на Македонија заради што ги повикувам сите пратеници независно од политичката определба да земат свое активно учество.
Истовремено, го изразувам и своето силно уверување дека единствено преку постојано надоградување на меѓусебните односи помеѓу сите релевантни чинители во државата, на најдобар можен начин ќе се помогне во насока на остварување на носечките македонски стратешки приоритети какви што несомнено се, членството во НАТО и ЕУ, унапредувањето на стратешките односи со САД, како и создавањето на сите неопходни претпоставки за економски, социјален и сеопшт развој на Македонија, се вели во соопштението на собраниската прес-служба.
Уставните судии денеска едногласно изгласаа времена мерка за запирање на сите изборни дејствија кои произлегуваат од оспорената одлука за распуштање на Парламентот. Со ова Уставниот суд ја отвори можноста, претседателот на Собранието, Трајко Вељаноски да го свика парламентот и да ја поништи одлуката за избори на 5. јуни.
Судот ја прифати Иницијативата на ДУИ и изрази сомнеж за уставноста на актот со кој се изгласало распуштање на Собранието со одложено дејство и следната недела ќе донесе конечна одлука дали одлуката за распуштање е уставна или не. До тогаш важи времената мерка за запирање на сите изборни дејства.