Поради „правни прашања“ повторно е одложено донесувањето одлука на Врховниот суд во Атина по жалбата за екстрадиција на поранешниот началник во УБК Горан Грујевски и неговиот колега Никола Бошковски, објави МИА.
Ново рочиште е закажано за 26 март.
По барање на адвокатите, денешното рочиште беше затворено за јавноста, а според најавите така ќе биде и наредното.
Како што објави МИА, двајцата грчки адвокати на Грујевски и Бошковски побарале од шестчлениот Совет на судии и обвинителот рочиштето да не биде јавано, а по барањето на претседателката на Советот, тие образложиле дека причината е што станува збор за политички прогон и двајцата се обвинети за политички криминал, нешто со што тие како одбрана не се согласуваат. Тие најавија дека во исказот на Грујевски и Бошковски ќе има прашања кои се доверливи и не се за во јавност.
Едниот од адвокатите образложил дека исказите што ќе ги дадат се однесуваат на политички случај, со прислушувањата по кои имаше политички пресврт и промена на власта. Исто така тој потсети дека и во Судот во Солун рочиштето било зад затворени врати. Како дополнителен аргумент, еден од адвокатите посочил дека во судницата има и новинари, кои што сакаат да објават што кажале Грујевски и Бошковски во исказот.
За Грујевски и Бошковски во Грција се водат три различни и меѓусебно неповрзани процеси: за фалсификуваните пасоши со кои беа фатени на солунскиот аеродром, барањето за азил поднесено на 29 ноември минатата година и за македонското барање за екстрадиција, за кој Советот на судии во Солун, на 5 јануари одлучи тие да бидат екстрадирани во Македонија.