Дежурен јавен обвинител од Основното јавно обвинителство (ОЈО) Скопје изврши увид на Меѓународниот аеродром Скопје каде околу 11:30 часот се преврте хеликоптер на Министерството за внатрешни работи (МВР). При увидот на лице место, заедно со увидни екипи на Министерството за внатрешни работи, се обезбедени трагите од хеликоптерската несреќа, се наведува во соопштението на ОЈО.
Од таму нагласуваат дека по наредба на јавниот обвинител се обезбедени видео записите од камерите на аеродромот, како и аудио снимките од комуникацијата на пилотот со контролата на летот, а извршен е првичен разговор со пилотот и со уште четири лица од екипажот на хеликоптерот.
Местото на настанот, како што стои во дописот на ОЈО, го посетиле и претставници на Комитетот за истрага на воздухопловни несреќи и сериозни инциденти кои ќе изготват извештај за незгодата.
Увидот на лице место е завршен, а хеликоптерот сè уште се наоѓа на местото и во положбата затекната по падот. Локацијата е обезбедена, велат од ОЈО, а во текот на утрешниот ден леталото ќе биде пренесено од аеродромската писта на друга локација, каде ќе се обезбедува до крај на постапката.
Во зависност од обезбедените докази како и од наодите во извештајот на Комитетот за истрага на воздухопловни несреќи и сериозни инциденти, ќе бидат утврдени причините за хеликоптерската несреќа. Доколку притоа бидат утврдени пропусти од субјективен карактер, Јавното обвинителство ќе поведе кривична постапка.