Денешниот ден, 25 јануари, е нераскинливо врзан за олимпиското движење и засекогаш ќе остане врежан во неговата историја. Во малото француско гратче Шамони што се наоѓа на тромеѓето со Италија и Швајцарија започнаа првите Зимски олимписки игри.
Настанот првично беше насловен како „Меѓународна зимска спортска недела“ и траеше до 5 јануари. Како организатор се јави Францускот олимписки комитет и во ретроспективите на Интернационалниот олимписки комитет (ИОК) се заведени како прва зимска Олимпијада.
Игрите во Шамони опфатија пет спорта. Олимпијците се натпреваруваа во санкање, во карлинг, во хокеј на мраз, во лизгање (уметничко лизгање и брзо лизгање) и нордиско трчање (воена патрола, крос-кантри, нордиска комбинација и скијачки скокови). Медали беа поделени во 16 настани во 9-те дисциплини.
Моменти што оставија белег во Шамони
Првиот златен медал на Олимпијадата го освои Американецот Чарлс Џутроу во трката на 500 метри брзо лизгање.
Норвежанката Соња Хение беше најмладата учесничка во Шамони. Имаше само 11 години и беше пријавена за настап во брзо лизгање. Го освои последното место, но ги освои и симпатиите на гледачите и тогашната јавност која во неа препозна голем потенцијал. Тоа го потврди со златни медали на наредните три Олимпијади.
Гилис Графстром стана првиот олимпиец кој успеа да одбрани титула. Швеѓанецот се натпреваруваше во уметничко лизгање, спорт кој беше присутен и на летната Олимпијада во Антверпен во 1920 година.
Импресивен настап имаа канадските хокеари на олимпискиот турнир. Победија во сите три меча во групата против Швајцарија, Чехословачка и Шведска со постигнати 85 гола и без ниту еден примен.
Французите, како домаќини, не освоија ниту еден златен медал. Нивните претставници се закитија со три бронзени одличја.
На првата зимска Олимпијада учествуваа 16 држави со вкупно 258 спортисти. Свои репрезенти во Шамони имаа Австрија, Белгија, Канада, Чехословачка, Финска, Франција, Велика Британија, Унгарија, Италија, Летонија, Норвешка, Полска, Шведска, Швајцарија, САД и Југославија со четворица олимпијци (Зденко Швигељ, Владимир Кајзељ, Душан Зинаја и Мирко Пандаковиќ) – сите во крос-кантри. Германците беа казнета со неучество на Игрите, па сами си организираа серија на спортски настани познати како „Дојче Кампшпиле“
Најуспешни по бројот на освоени медали беа Норвежаните со 17 медали од кои четири златни, седум сребрени и шест бронзени пред Финска со 11 (по 4 златни и сребрени и 3 бронзени). Австријците и Швајцарците понесоа по три (по две златни), Американците и Британците по четири (по една златна), Шведска две, Франција три (сите бронзени) и Канада и Белгија по една.
