Канцеларијата на Обединетите нации за координација на хуманитарни прашања (ОЦХА) денеска соопшти дека е многу загрижена поради последиците од сушата во Етиопија и побара дополнителни средства за справување со ситуацијата во земјата, пренесува Би-Би-Си.
Во соопштението се наведува дека сушата во Етиопија погодува речиси четири милиони луѓе во областите Амхара и Оромија зафатени со војна, како и во регионите Афар и Тиграј.
„Повеќето кризи, кои често се преклопуваат, сериозно ја ослабнаа способноста на населението да се справи со климатските промени, како што е сушата, оставајќи милиони луѓе крајно ранливи и подложни на уште поголема сиромаштија“, се додава во соопштението на агенцијата.
Федералната влада во Адис Абеба претходно ја минимизираше заканата од глад, но исто така најави дека работи на обезбедување на многу потребната хуманитарна помош.
Оваа недела властите во сојузната држава Тиграј соопштија дека над 200 луѓе умреле од глад. Најавата доаѓа по предупредувањата во декември дека регионот е „на работ на хуманитарна катастрофа“.