Пандемијата на коронавирус може да однесе најмалку 300.000 Африканци и во екстремна сиромаштија да втурне 29 милиони лица, соопшти вчера Економската комисија на ОН за Африка (УНЕЦА), повикувајќи се на безбедносната мрежа вредна 100 милијарди американски долари.
Досега во Африка се пријавени околу 20.000 случаи на ковид-19 што е малку во споредба со остатокот од светот, каде се заразени околу два милиона лица.
Но, Светската здравствена организација (СЗО) пред два дена предупреди дека за три до шест месеци во Африка може да има и 10 милиони заразени случаи.
„За заштитата и изградбата на нашата заедничка благосостојба потребни се 100 милијарди американски долари за да се одговори со создавање на здравствена и социјална безбедносна мрежа“, се наведува во извештајот на УНЕЦА, пренесува Хина.
Оваа агенција на Обединетите нации, исто така, го поддржува и повикот на африканските министри за финансии за дополнителни 100 милијарди американски долари стимул, што ќе вклучува и прекин на долговите кон странство.
УНЕЦА предвидува четири сценарија што се темелат на нивото на превентивно дејствување на африканските влади.
Без овие интервенции, истражувањето предвидуваше дека годинава ќе се заразат 1,2 милијарди Африканци од кои 3,3 милиони ќе починат. Но, и во најдоброто сценарио, во кое сите влади ги спроведуваат мерките, на Африка и се закануваат 122,8 милиони заразени лица, 2,3 милиони хоспитализирани и 300.000 смртни случаи.