Најмалку 100 цивили, меѓу кои 20 се деца загинале во бомбардирањето на предградието на Дамаск, е новиот биланс од нападите што го соопшти Опсерваторијата за човекои права.
Сириските авиони ја гаѓале источна Гута, упориште на бунтовниците во предградието на сирискиот главен град.
Билансот на жртвите расте, додека артилериските и нападите од воздух и засилувањето на позициите на владините сили навестуваат скорешни копнени напади на енклавата која е под власт на бунтовниците уште од 2013 година.
ОН во понеделникот упатија итен апел веднаш да запрат авионските напади на Гута.
-Хуманитарната ситуација на цивилите во источна Гута е целосно надвор од контрола, изјави во Бејрут Панос, Мумцис, координатор на ОН за хуманитарна помош во Сирија.
-Веднаш треба да се запре ова неразумно човечко страдање. Бомбардирањето на недолжните цивили и инфраструктурата мора веднаш да запре, рече тој.
Директорот на сириската Опсерваторија за човекови права со седиште во Велика Британија Рами Абдел Рахман изјави дека сирискиот режим интензивно ја бомбардира источна Гута, подготвувајќи се за копнена офанзива. Според оваа невладина организација, во вчерашните напади на ова предградие на Дамаск загинале 17 цивили.
Националната коалиција на Сирија, со седиште во Турција, гланата опозиција партија во егзил, во изјавата ја осуди војната до истребување во источна Гута, како и меѓународниот молк за злосторствата на силите на претседателот Башар ал Асад во војната која трае речиси седум години.
Во неделата режимот испука стотина ракети на ова подрачје, а во понеделникот во воздушните напади се убиени повеќе цивили на неколку подрачја. Ранети и мртви имало во сите импровизирани болници, објави АФП.
Уште од 5 февруари војската започна петдневна кампања напади од воздух без преседан врз Гута, при што беа убиени над 250 цивили а стотина беа ранети.
Две исламистички бунтовнички групи го контролираат источниот дел на Гута, но таму се засолнети и припадници на џихадистичката група Ал Шам Хајат Тахрир.
Иако во тек се преговори, џихадистите да си заминат, засилувањето на притисокот покажува дека режимот се подготвува за копнена офанзива.
Во соопштението, опозициската коалиција ја обвини Русија сојузник на сирискиот режим, дека со своето делување го закопува политичкиот процес за решавање на судирот кој од 15 март 2011 година до сега одзел над 340.000 животи.
Режимот сака да ја преземе Гута и да ги спречи ракетните напади на бунтовниците врз Дамаск. Во неделата навечер шест ракети го погодиле Дамаск, при што е убиен еден функционер.
Од 5 февруари, над 20 цивили загинале во нападите во Дамаск.
По првобитните борби на бунтовниците и режимот, војната во Сирија стана посложена со вклучување на џихадистичките групи и регионалните и меѓународните сили.