Новак Ѓоковиќ е топ тема во светскиот спорт. Поради освоена титула на Австралија опен, негова 15. во кариерата, но и поради начинот на кој се справи со Рафаел Надал во финалето. Конечни 6:3, 6:2, 6:3 за само 126 минути игра на „Род Лејвер“ арена. Се очекуваше маратон, можеби сличен и на оној од 2012 година кога двајцата тенисери „изгинаа“ речиси шест часа на централниот терен во Мелбурн парк, но Србинот ги демантира таквите предвидувања и со спринт истрча до тронот.
Највлијателните светски медиуми со право му посветуваат голем простор во информативните изданија на телевизиите, на спортските страници во весниците и на колоните резервирани за колумни и коментари. Меѓу таквите примери и влијателниот британски „Гардијан“ во кој авторот Кевин Мичел вели:
„Делува дека Надал може да го запре Новак само на Ролан Гарос, но и тоа повеќе не е сигурен облог како што беше некогаш. Србинот потврди нова доза на перфектност со освојување на Австралија опен, па сега се врти кон ултимативен предизвик во форма на триумф над Надал и на париската прашина“, е само дел од статијата на Мичел.
Тој притоа се прашува „кој може да го запре Ѓоковиќ“ на АТП турот по партиите во Мелбурн за кои вели дека се патоказ во кој правец ќе се движи машкиот тенис во 2019 година. Во дилемите ја има предвид променливоста и неконстантата на Роџер Федерер и откажувањето на Енди Мареј. А, малку веројатно е дека некој од „некст ген“ како што популарно го нарекуваат младиот бран на тенисери ќе може да застанат на патот на српскиот ас кој игра компјутерски прецизно.
„Ако Надал, освен на моменти, не можеше да даде посериозен отпор на Ѓоковиќ во финалето што траеше едвај два часа и шест минути и во кое освои само осум гема, но не и противнички сервис, мала е веројатноста дека некој од останатите ќе може да го предизвика човекот што освои три гренслем титули во низа и кој во 2019 година има шанса за календарски слем во што би бил прв по Род Лејвер во далечната 1969 година“, пишува Мичел.
Легендарниот австралиски тенисер, Пет Кеш по финалето истакна дека „одамна не видел некој така моќно и прецизно да удира по топчето во меч за гренслем титула“. Матс Виландер, кој работи како коментатор на „Евроспорт“, не криеше импресии од перформансот на Ѓоковиќ иако Швеѓанецот честопати знаел да го пецне Србинот на сметка на Федерер или Надал или Мареј. Но, овојпат и нему му беше затворена уста со рекордната седма титула во Мелбурн од седум обиди на најдобриот светски рекет во моментот.
Ѓоковиќ: Рекордот на Федерер е сè уште далеку
Ѓоковиќ на Австралија опен го претекна Пит Сампрас по бројот на гренслем трофеи. Рекордер е Федерер со 20, Надал е втор со 17, две повеќе од српскиот тенисер кој ако продолжи во овој стил ќе се израмни со Шпанецот уште во оваа година. Но, за напад на Швајцарецот веднаш ја спушти топката.
„Лидерот е сè уште далеку. Да се креира историја во нашиот спорт е нешто посебно и, секако, дека ме мотивира. Мој приоритет во наредните сезони е настап на најголемите турнири меѓутоа не знам уште колку сезони ќе бидат. Не размислувам дотолку однапред. Важно е да се фокусирам на постојано подигнување на нивото на игра и да задржам ментална, физичка и емотивна сила. Само така може да имам шанса за доближување до рекордот на Роџер“, истакна Ѓоковиќ.
Покрај Пит Сампрас, Ѓоковиќ по финалето со Надал остави зад себе уште некои легенди на „белиот“ спорт. Како на пример Рој Емерсон и Роџер Федерер по бројот на титули на Австралија опен, а веќе во мај и јуни во Париз ќе има прилика да го повтори подвигот на Род Лејвер, чие име го носи централниот терен во Мелбурн парк, кој во 1969 година ги освои сите четири гренслеми во период од 12 месеца. Но, дотогаш има време. Сега се моменти за заслужено уживање, славаа, публицитет и, секако, одмор. Наредниот турнир за кој е пријавен Ѓоковиќ е Мастерсот во Индијан Велс во март.