Секторот за инспекциски работи на Општина Центар затвори градилиште на Водно лоцирано на улицата „Христо Чернопеев“ бб.
Овластен градежен инспектор доднесе решение со кое се наредува на инвеститорот, физичко лице со живеалиште во Струга, во законски предвидениот рок да прекине со сите градежни активности и да ја отстрани градбата.
Се работи за објект од втора категорија со намена А1 – домување во станбени куќи, со димензии 11.8 метри на 8.9 метри, изграден од армирано бетонска конструкција на улица „Христо Чернопеев“ бб, дел од локалитетот Тасино Чешмиче 1 и Тасино Чешмиче 2.
На инвеститорот на објектот, овластен градежен инспектор во јули минатата година, му издал решение со кое му се наложува итен прекин на градежните работи. И покрај добиеното решение за прекин на изградбатата, инвеститорот продолжил со изградба на објектот, спротивно на издаденото одобрение за градење и заверениот основен проект.
Инспекцијата извршила надзор и донела решение со кое бара инвеститорот во даден рок да ја отстрани градбата. Во
спротивно, општината ќе ја отстрани а трошоците за тоа ќе ги плати инвеститорот.
„Апелираме до сите инвеститори и сопственици на нелегални објекти, да постапуваат по издадените решенија за отстранување на објектите. Во спротивно, како во овој случај, така и понатаму, општината присилно ќе ги отстранува објектите, со што трошоците за отстранувањето ќе ги плаќаат инвеститорите, односно сопствениците на нелегално изградени објекти“, велат од општината.
