Општина Струмица соопшти дека испратила хуманитарна помош во поплавените региони во висина од 1 милион денари
Помошта се состои од вода за пиење, конзервирана храна, средства за лична хигиена и друг вид помош согласно одлуката на Советот.
Во општината продолжува и хуманитарната акција за собирање помош за настраданите во просториите на домот на АРМ секој ден до петок од 8 до 21 часот.
Извршниот комитет на ВМРО-ДПМНЕ на синоќешната седница донел одлука да се формира партиски солидарен фонд за помош на настраданите во кој сите избрани и именувани функционери на партијата на државно и локално ниво, наредниот период ќе донираат еднократна помош од по 30 проценти од платите и надоместоците во солидарниот фонд, а по завршување на акцијата средствата ќе бидат префрлени за помош на оштетените сограѓани.
Освен финансиската помош, договорено е да продолжат организираните активности на терен преку собирање на донации на храна, вода, средства за хигиена и останата помош која им е најнеопходна на погодените.
На терен меѓу жителите на Сингелиќ, Стајковци и Инџиково се и лидерите на СДСМ и на Демократскиот сојуз.
Како што се наведува во партиските соопштенија , жителите се жалат на спорите реакции на надлежните институции и забележуваат што на самите граѓани е оставено пријавувањето на штетите во општините за дури потоа да излезат надлежните Комисии.