Владејачката партија на унгарскиот премиер Виктор Орбан, Фидес, доживеа неочекуван пораз на локалните избори во неделата, кога независниот кандидат за градоначалник на Ходмезовашархеј на југот на земјата, поддржан од опозицијата лесно го победи кандидатот Фидес.
Десничарската националистичка партија на Орбан, Фидес, бара трет последователен мандат на парламентарните избори, спроведувајќи кампања со жестоката анти-имигрантска порака, заедно ветувањата за зголемување на платите и на пензиите.
Но, прелиминарните резултати покажаа дека Питер Марки-Зај, кој важи за политички почетник, го победи Золтан Хедедус со 57,5 отсто од гласовите наспроти 41,6 отсто, во градот кој важи за упориште на партијата Фидес.
-Новата ера започна денеска, рече Марки Зај на прес конференција, додавајќи дека анкетите за јавното мислење што покажуваат доминантно водство на Фидес “може да бидат фрлени во корпата за отпадоци”.
Исходот од овие избори, на шест недели пред парламентарните избори, оценува Ројтерс, е голем пораз за партијата на Орбан. Ходмезовашархеј е родното место на Јанош Лазар, шеф на кабинет на Орбан, кој лично ја водеше кампањата на Хегедус.
Сепак, Фидес на Орбан се уште е голем фаворит на изборите на 8-ми април, но политичките аналитичари сметаат дека резултатите од неделата би можеле да ја променат динамиката во опозицијата, која досега се бореше да се справи со сериозен предизвик.
-Овој резултат има големо психолошко значење, изјави политичкиот аналитичар Роберт Ласло, додавајќи дека тоа покажува дека Фидес може да биде победена дури и на ваков начин и резултатот „би можел да ги поттикне опозициските партии да ги преиспитаат своите стратегии”.
Марки-Зај настапи како независен, но беше поддржан од социјалистите, радикалниот националист Јобик, главната опозициска партија, како и мала либерална партија ЛПМ.
Одѕивот од 62,4 отсто е повисок од очекуваното, и го надмина оној од 58,8 отсто на претходните парламентарни избори пред четири години.