Унгарскиот премиер Виктор Орбан ги нарече „корисни идиоти“ оние кои бараат исклучување на неговата партија Фидес од Европската народна партија (ЕПП) и додаде дека нивните напори им користат само на интересите на левицата.
„Тоа не го разбираат сите, но во академската литература Ленин ги нарече „корисни идиоти“. Иако мислат дека водат интелектуална борба, тие, всушност им служат на интересите на нашите противници, рече Орбан за германскиот весник „Велт ам Зонтаг“.
Тој оцени дека нападите доаѓаат „од левата страна” со цел да се ослабне ЕПП.
„Кога нема да сме тука повеќе, на ред ќе дојдат Италијанците, а потоа и Австријците. Ова се нарекува „салама“ тактика“, рече Орбан.
Коментарите на Орбан се последица лобирањата на неколку партии што припаѓаат на Европската народна партија во Европскиот парламент за суспензија на унгарската партија Фидес или нејзино исклучување поради зголемена антисемитска и антиевропска реторика, пишува „Политико“, наведувајќи дека Фидес пред две недели почна кампања со постери со антисемитски примеси што се однесуваат на финансиерот Џорџ Сорос и претседател на Европската комисија, Жан-Клод Јункер.
Кампањата, во која се сугерира дека ЕУ е премногу блага кон миграцијата, налути многу вклучувајќи го и Манфред Вебер, водечкиот кандидат на ЕПП за претстојните избори и фаворит за нов претседател на Европската комисија, кој го повика Орбан да се извини за кампањата.