Вицепремиерот и главен координатор на кризните штабови за спречување на ширењето на ковид-19, Бујар Османи во пресрет на отворањето на џамиите што е најавено за утре, ги охрабрува верниците да не ги посетуваат се додека не се стабилизира состојбата со вирусот.
„Немаме начин да ги затвориме џамиите. Не постои уставна и законска можност државата да затвори објекти. Тука е прашање на соработка, на договор помеѓу институциите. Јас ќе ги охрабрам луѓето да не одат, затоа што додека не сме сигурни дека состојбата е толку подобрена да може да влезе во таа втора фаза“, рече Османи, при гостувањето во емисијата „Отворено студио“ на ТВ 24.
Тој истакна дека одлуката за отворање на верските храмови требала да се донесе координирано, а не поединечно. Не се координирале, појасни тој, ниту за настанот со литијата во Струга, ниту за отворањето на џамиите.
„Јас бев известен од страна на ИВЗ откако тие ја донесоа одлуката. Ја добив пораката по полноќ дека е донесена одлука за отворање на џамиите. Во текот на наредниот ден имав целодневен разговор со поглаварот на ИВЗ и кога видов дека нема начин да се измести таа одлука, тогаш проценив дека е најважно сега да соработуваме, бидејќи најлошо е доколку се лутиме ќе почнеме да си кажеме еден на друг нешто и секој ќе си тера по своето. Одлуката е донесена и сега да видиме што можеме да спасиме. Според нив, не може да се смени одлуката, освен ќе го цитирам поглаварот кој рече: „Доколку се влоши состојбата, може евентуално да седнат“, рече Османи.
Порача да не се настапува ривалски, затоа што, потенцираше, од тоа ќе изгубат сите.
„Мене тоа ми беше и целта за посетата на Струга и намерно на состанокот го повикав и отец Васил кој е надлежен за Струга и муфтијата од Струга, бидејќи тоа што најмногу ме исплаши е доколку почне такво ривалство помеѓу заедниците, но и одредено ривалство што го гледам меѓу тие што сакаат да одат во верските објекти и тие што не сакаат. Со тоа ќе губат сите, ќе губат и верниците. Прво, не смееме да дозволиме таква поларизација и тука мислам дека постигнавме едно разбирање помеѓу сите дека тоа не смее да се случи и затоа јас кога видов мала асиметрична реакција кон верските заедници во смисла на напади, оти пропусти имаше секаде. Пропусти имаше и меѓу здравствените работници на одредени места, имаше и во бизнисите, и во верските заедници“, рече Османи.
Лично смета дека во наредниот период ќе има зголемен број заразени и поради тоа повикува на внимателност. Очекува утре на седница на Влада да се донесе одлука за олеснување на мерките, но за одредени сегменти кои се помалку ризични.