Обезбедување на 55 респиратори и друг неопходен материјал за Клиниката за инфективни болести и фебрилни состојби во Скопје и помош од меѓународни донатори за поддршка на буџетот. Ова го најави вицепремиерот на Владата за европски прашања, Бујар Османи на денешната прес-конференција, согласно потребите на земјата за справување со пандемијата од коронавирусот.
Како национален координатор за странска помош, истакна тој, минатата недела беше формирана работна група од претставници на институциите како едно централно тело во кое се собираат сите приоритети и потреби на институциите во комуникција со меѓународните донатори. При тоа првично е направена листа од 89 артикли за потребите на Инфективната клиника за проектирана состојба од 2.000 пациенти кои би имале потреба за лекување на Клиниката.
Направени се и три дополнителни листи за пет институции и тоа за Министерството за здравство, за МВР, МО, ЦУК и ДЗС и тоа за потреби за еден месец, за период од еден до три месеци и за период од три до шест месеци. Паралелно е формирано и координативно тело на агенциите на ОН со Делегацијата на ЕУ и претставниците на нашето координативно тело кое на дневна основа ги централизираат потребите на институциите како и можностите на донаторите за обезбедување на потребите на институциите.
„Досега се обезбедени 25 респиратори преку средства на амбасадата на Норвешка и преку Агенцијата на ОН. Тие во моментот се наоѓаат во депо во Турција и се разговара како да се транспортитаат во отежнати зимски услови во земјата за потребите на Инфективната клиника“, рече Османи при што се разгледуваат опции за заеднички транспорт со другите држави од регионот.
Вицепремиерот за европски прашања посочи дека се обезбедени и 30 респиратори од Кина со средстава на Европската Унија, од првите четири милиони евра што ги обезбеди Делегацијата на ЕУ, а ќе се купуваат преку УНДП. Се разговара како да се транспортираат тие во Скопје, рече Османи.
Османи рече дека Кина позитивно одговорила на наше барање за обезбедување на респиратори, но не може да се каже точната количина што ќе се добијат од билатералната соработка бидејќи, вели, во моментов 100 земји бараат исто.
Тој потсети дека еврокомесарот Вархеји информирал за одлуки на ЕУ со кои ќе и помогнат на земјава за борба против коронавирусот во вредност помеѓу 65 и 70 милиони евра (4 милиони евра за набавка на респиратори од Кина, 50 милиони ева кои земјата ги добила како награда за реформите ќе бидат пренасочени за олеснување на социоекономските ефекти од пандемијата, 9 милиони евра за програмата за поддршка на МСП и 3 милиони евра за поддршка на Буџетот.)
Од Вархеји е добиена и потврда дека се разгледува можноста за пристап до Европскиот солидарен фонд за справување со елементрани непогоди и пандемии, за што се очекува конечна потврда од Европскиот совет најдоцна до утре. Фондот може да го користат земјите членки и земјите кои преговараат, а среќна околност е што добивме одлука за почеток на преговори со ЕУ со што добиваме право да имаме пристап до овој фонд.
„По првичниот шок од епидемијата со Ковид-19, Европската Унија почна да ги активира механизмите за заедничко делување и солидарност. Можеби за некого тоа изгледа бавно, но реакцијата на ЕУ е навремена имајќи предвид дека ова се само првични активности за поддршка кои со сигурност ќе се зголемуваат во периодот што претстои како од ЕУ така и во рамки на билатералната соработка со земјите членки“, нагласи Османи.