Министерот за надворешни работи Бујар Османи за предложената Резолуција на опозоциската партија ВМРО-ДПМНЕ вели дека проблемот не го гледа во содржината, туку во формата за усвојување на Резолуцијата без консензус на политички партии. Во случај да се постигне согласност, ДУИ ќе ја поддржи резолуцијата, вели Османи, но покредибилна ќе биде позицијата на сите чинители ако се задржи консензус по однос на овие прашања.
-Важно беше иницијативата во Собранието да биде донесена со консензус, затоа што макотрпно работевме во овој период да изградиме државна позиција по однос на овие сензитивни прашања коишто имаат елементи на етнички позиции… За нас како дипломатија беше многу лесно кога зборувавме во име на сите граѓани, без ниедна дисонантност. И јас од тука се плашев дека кое било дерогирање на државната позиција во етничка позиција може да ни ги ослаби позициите, рече министерот Бујар Османи во гостување на Сител телевизија.
На прашањето зошто гледа етничка позиција, тој одговори дека неговата реакција била со цел да му укаже на Собранието дека не смее во законодавниот дом да се усвои Резолуција ако нема претходно усогласен консензус меѓу политичките партии од сите етнички заедници.
–Тој мој апел се разбра и од предлагачите, меѓутоа и од другите политички партии коишто почнаа еден поактивен ангажман за да се постигне тој консензус по однос на текстот и мене ми е драго што еве, политичките партии, вклучувајќи ја и мојата партија се веќе во комуникација да го усогласат текстот и да излезат со целосна поддршка. Мислам дека доколку имаше само етничка позиција, бидејќи тоа се обидовме да го премостиме, односно да го доизградиме како државна позиција и успеавме, вели Османи.
Додаде дека независно од содржината, формата е многу важна бидејќи испраќа порака.
-Замислете оваа резолуција да помине во Собранието без гласовите на пратениците од другите етнички заедници. Каква порака даваме пред Бугарија, каква порака даваме пред светот – дека имаме етнички позиции. За мене беше клучно дека не смее да се донесе Резолуција ако нема поддршка од сите политички партии затоа што тука почнува проблемот, вели министерот Османи.