Уругвај – Португалија и Шпанија – Русија се првите осминафинални двојки на 21. Светско првенство во фудбал. Се формираа по денешните дуели од последното коло во групите А и Б во кои се постигнаа вкупно 12 гола, а притоа падна и нов рекорд на мундијалите.
Уругвајците ја добија Русија со 3:0, а со тоа и директната битка за лидерската позиција во А конкуренцијата. Головите за „ла селеста“ ги постигнаа Суарез од слободен удар во 10. минута, Черишев (автогол) во 23. минута и Кавани во 90. минута. Олеснителна околност притоа имаа во исклучувањето на Смолников кој во само девет минути во првиот дел собра два жолти картона и ја остави „зборнаја“ на цедило на „Космос арена“ во Самара.
Египет го напушта турнирот во Русија како најслаб тим во групата А иако таквата улога пред почетокот и беше доделена на С. Арабија. Ниту водството што во 22. минута го осигура Мо Салах не беше доволно за „фараоните“ за избегнување на третиот пораз на завршниот турнир, а со тоа и фенерот на табелата. До паузата за одмор, азиската репрезентација доби два пенала од кои го реализира оној во судиското продолжение за 1:1, а за нивна победничка разделба со Русија се погрижи Ал Давсари во петтата минута од надополнувањето.
https://www.youtube.com/watch?v=YByik6CWi10
Иран пропушти зицер за шок на Португалците, Мароко двапати водеше, Шпанија двапати израмнуваше
Двата меча од последното коло во групата Б завршија без победник. Шпанија и Мароко одиграа 2:2 додека Португалија и Иран 1:1, резултати кои им одговараа на пиринејските соседи за топ 16 фазата. Но, ако „фуријата“ не беше во опасност од елиминација, дружината на Кристијано Роналдо беше неизвесна и пораз ќе значеше крај на настапите во Русија.
https://www.youtube.com/watch?v=ILLgNnYSCCU
Португалците поведоа во 45. минута преку Кварежма и имаа идеална прилика во раната фаза од второто полувреме за мирен финиш на мечот. Но, Роналдо не успеа да екзекутира од белата точка и ги остави Иранците со надеж дека чудо е, сепак, можно. Тоа во што ѕвездата на Реал Мадрид не успеа во 53. минута, му успеа на Ансарифард во третата од седумте во судиското екстра време за солзи радосници меѓу нивните фанови на трибините на „Мордовија арена“ во Саранск. А, по неа и шанса во која се заледи крвта во вените на Португалците меѓутоа Мехди Тареми го погоди само надворешниот дел од мрежата на Руи Патрисио. Набрзо потоа парагвајскиот арбитар Касерес означи крај на средбата за растоварување на товарот од плеќите на Фернандо Сантош.
Мароканците двапати водеа на стадионот во Калининград, Шпанија двапати израмнуваше за конечни 2:2 и одбрана на првото место во групата. Бутаиб во 14. минута и Ел Несири во 81. минута „стрелаа“ за африканската репрезентација, Иско во 19. минута и Аспас во 90’+1’ возвраќаа и спречија изненадување на брегот на Балтикот.
Иран – Португалија 1:1 (0:1)
Стадион: „Мордовија арена“ во Саранск. Гледачи: 41.685. Гл. судија: Енрике Касерес. Асистенти: Едуардо Кардозо и Хуан Зорилја (сите тројца од Парагвај). Ж. картони: Хајсафи, Азмун (Иран); Гереиро, Кварежма, Роналдо, Соареш (Португалија). Стрелци: Ансарифард во 90’+3’ за Иран; Кварежма во 45’ за Португалија.
Иран (формација 4-5-1): Беиранванд – Хајсафи (Мохамади 56’), Пуралиганџи, Хосеини, Резаејан – Амири, Ебрахими, Езатолахи (Ансарифард 76’), Јаханбакш (Годос 70’), Тареми – Азмун. Селектор: Карлос Квеирош.
Португалија (формација 4-4-2): Руи Патрисио – Гереиро, Фонте, Пепе, Соареш – Марио (Мутињо 84’), Ад. Силва, Карвалјо, Кварежма (Б. Силва 70’) – Ан. Силва (Гуедеш 90’+6’), Роналдо. Селектор: Фернандо Сантош.
СП 2018 во фудбал
Група А
Резултати, 3 коло
Уругвај – Русија 3:0
Саудиска Арабија – Египет 2:1
Табела: Уругвај 9, Русија 6, Саудиска Арабија 3, Египет 0.
Група Б
Резултати, 3 коло
Иран – Португалија 1:1
Шпанија – Мароко 2:2
Табела: Шпанија 5, Португалија 5, Иран 4, Мароко 1.