Кире Лазаров го продолжи договорот со Нант според кој ќе остане во францускиот тим до 2021 година. Актуелната соработка на капитенот на македонската ракометна репрезентација и клубот од брегот на Атлантикот беше со важност до крајот на тековната сезона. „Бомбардерот“ на националниот тим изрази задоволство што ќе остане во клубот на кој му пристапи лани и, секако, за брзата адаптација во средината.
„Среќен сум што останувам уште две години во овој клуб. Се соочив со проблеми на почетокот што беа поврзани со непознавањето на францускиот јазик, но ситуацијата е драстично променета на подобро за само една година. Одлично бев прифатен, одличено се чувствувам, уживам во градот, ги сакам навивачите. По природа сум лојален и сакам да возвратам на довербата на управата на клубот на најдобар моќен начин“, изјави Лазаров за официјалната интернет страница на Нант.
Нант е десетти клуб во кариерата на Кире Лазаров вклучувајќи го и периодот како младинец. Почна во екипата на Овче Поле во неговото родно Свети Николе и преку велешки Борец стигна до Пелистер. Статус на интернационалец има од 2000 година. Во два наврата го носеше дресот на Загреб, а играше уште и за Веспрем, за Ал Сад, за Сиудад Реал, за Атлетико Мадрид и за Барселона.